ಭಾರತ ಮತ್ತು ಪಾಕಿಸ್ತಾನಕ್ಕೆ ಬಿಸಿಲು ಹೊಸತೇನಲ್ಲ. ಜೂನ್ನಲ್ಲಿ ಮುಂಗಾರು ಮಳೆ ಬರುವ ಮುನ್ನ ಬಿಸಿಲು ತನ್ನ ಪರಾಕಾಷ್ಠೆಯನ್ನು ತಲುಪುವುದು ಈ ಪ್ರದೇಶದ ಸಾಮಾನ್ಯ ಲಕ್ಷಣ. ಆದರೆ, ಈ ವರ್ಷದ ಬಿಸಿಲು ಹಿಂದಿನ ಎಲ್ಲ ಮಿತಿಗಳನ್ನು ಮೀರಿದೆ. ಏಪ್ರಿಲ್ ಮಧ್ಯಭಾಗದಿಂದಲೇ ತೀವ್ರ ಮತ್ತು ನಿರಂತರ ಶಾಖ ಆರಂಭವಾಗಿದೆ. ಹಲವು ಕಡೆಗಳಲ್ಲಿ ದೈನಂದಿನ ಗರಿಷ್ಠ ತಾಪಮಾನ 46°C ದಾಟಿದೆ, ಇದು ಸಾಮಾನ್ಯಕ್ಕಿಂತ 5-8°C ಹೆಚ್ಚಾಗಿದೆ.
ಈ ಅಸಹನೀಯ ಬಿಸಿಲಿನಿಂದಾಗಿ ಭಾರತದಲ್ಲಿ ವಿದ್ಯುತ್ ಬೇಡಿಕೆ ದಾಖಲೆ ಮಟ್ಟಕ್ಕೆ ಏರಿದೆ ಮತ್ತು ಎರಡೂ ದೇಶಗಳ ಸುಮಾರು 10 ಲಕ್ಷ ಚದರ ಕಿಲೋಮೀಟರ್ ಪ್ರದೇಶದಲ್ಲಿ ಬರಗಾಲದ ಪರಿಸ್ಥಿತಿ ಉಲ್ಬಣಿಸಿದೆ.
ಅತಿಯಾದ ಶಾಖದೊಂದಿಗೆ ಆರ್ದ್ರತೆ (Humidity) ಸೇರಿದಾಗ ಅದು ಜೀವಕ್ಕೆ ಕುತ್ತು ತರುತ್ತದೆ. ಇಂತಹ ಸ್ಥಿತಿಯಲ್ಲಿ ಮಾನವ ದೇಹವು ತನ್ನನ್ನು ತಾನು ತಂಪಾಗಿ ಇರಿಸಿಕೊಳ್ಳಲು ಹೆಣಗಾಡುತ್ತದೆ. ಈ ಶಾಖದ ಅಲೆಯಿಂದಾಗಿ ಭಾರತದಲ್ಲಿ ಕನಿಷ್ಠ 37 ಮತ್ತು ಪಾಕಿಸ್ತಾನದಲ್ಲಿ 10 ಮಂದಿ ಮೃತಪಟ್ಟಿದ್ದಾರೆ. ಭಾರತದಲ್ಲಿ ಶಾಖ ಸಂಬಂಧಿತ ಸಾವುಗಳನ್ನು ವ್ಯವಸ್ಥಿತವಾಗಿ ದಾಖಲಿಸದ ಕಾರಣ, ಈ ಅಂಕಿಅಂಶಗಳು ನಿಜವಾದ ಸಂಖ್ಯೆಗಿಂತ ಬಹಳ ಕಡಿಮೆಯಿರಬಹುದು.
ಇಷ್ಟೊಂದು ಬಿಸಿಲಿಗೆ ಕಾರಣಗಳೇನು?
ಹೆಚ್ಚಿನ ಒತ್ತಡದ ಹವಾಮಾನ ವ್ಯವಸ್ಥೆ: ಈ ವರ್ಷ ಭಾರತ ಮತ್ತು ಪಾಕಿಸ್ತಾನದ ಮೇಲೆ ಪ್ರಬಲವಾದ ‘ಹೈ-ಪ್ರೆಶರ್’ ಸಿಸ್ಟಮ್ಗಳು ನೆಲೆಸಿವೆ. ಇವು ಮೋಡಗಳು ರೂಪುಗೊಳ್ಳುವುದನ್ನು ತಡೆದು, ಮಳೆ ಬರುವ ಸಾಧ್ಯತೆಯನ್ನು ಕಡಿಮೆ ಮಾಡುತ್ತವೆ ಮತ್ತು ಬಿಸಿಯಾದ ಗಾಳಿಯನ್ನು ಭೂಮಿಯ ಮೇಲ್ಮೈಯಲ್ಲಿಯೇ ಬಂಧಿಸುತ್ತವೆ.
ಒಣಗಿದ ಮಣ್ಣು: ಮಳೆ ಇಲ್ಲದ ಕಾರಣ ಮಣ್ಣು ಒಣಗಿದ್ದು, ಇದು ಬಿಸಿಲನ್ನು ಇನ್ನಷ್ಟು ಹೆಚ್ಚಿಸುತ್ತಿದೆ.
ನಗರಗಳ ಶಾಖ ದ್ವೀಪ ಪರಿಣಾಮ: ನಗರಗಳ ಕಾಂಕ್ರೀಟ್ ಮತ್ತು ಡಾಂಬರು ರಸ್ತೆಗಳು ದಿನವಿಡೀ ಬಿಸಿಲನ್ನು ಹೀರಿಕೊಂಡು ರಾತ್ರಿಯ ವೇಳೆಯೂ ಶಾಖವನ್ನು ಬಿಡುಗಡೆ ಮಾಡುತ್ತವೆ. ಇದರಿಂದ ರಾತ್ರಿಯೂ ಬಿಸಿ ತಾಪಮಾನವೇ ಇರುತ್ತದೆ.
ಹವಾಮಾನ ಬದಲಾವಣೆ: ಹವಾಮಾನ ಬದಲಾವಣೆಯು ಈ ಶಾಖದ ಅಲೆಗಳನ್ನು ಮೂರು ಪಟ್ಟು ಹೆಚ್ಚು ಸಂಭವನೀಯ ಮತ್ತು ಸುಮಾರು 1°C ಹೆಚ್ಚು ಬಿಸಿಯಾಗುವಂತೆ ಮಾಡಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಜಾಗತಿಕ ತಾಪಮಾನ ಹೀಗೆಯೇ ಏರಿಕೆಯಾದರೆ, ಭವಿಷ್ಯದಲ್ಲಿ ಇಂತಹ ಶಾಖದ ಅಲೆಗಳು ಪ್ರತಿ 2-3 ವರ್ಷಗಳಿಗೊಮ್ಮೆ ಬರುವ ಸಾಧ್ಯತೆಯಿದೆ.
