ಬಕ್ಸರ್ (ಬಿಹಾರ): ಬಿಹಾರದ ಬಕ್ಸರ್ ಜಿಲ್ಲೆಯ ಧನ್ಸೋಯಿ ಬಜಾರ್ನ ಲೋಹರ್ ಟೋಲಿಯಲ್ಲಿ ನಾಪತ್ತೆಯಾಗಿದ್ದ ವ್ಯಕ್ತಿಯೊಬ್ಬರು 23 ವರ್ಷಗಳ ನಂತರ ಮನೆಗೆ ಮರಳಿರುವ ನಾಟಕೀಯ ಮತ್ತು ಭಾವುಕ ಘಟನೆಯೊಂದು ನಡೆದಿದೆ. 23 ವರ್ಷಗಳ ಹಿಂದೆ ಮನೆ ಬಿಟ್ಟು ಹೋಗಿದ್ದ ಯುವಕನೊಬ್ಬ, ಸೋಮವಾರ ಯೋಗಿಯ ವೇಷದಲ್ಲಿ ಭಿಕ್ಷೆ ಬೇಡುತ್ತಾ ಕುಟುಂಬದ ಮುಂದೆ ಪ್ರತ್ಯಕ್ಷನಾಗಿದ್ದಾನೆ.
ಉದ್ದನೆಯ ಕೂದಲು, ದಟ್ಟವಾದ ಗಡ್ಡ ಮತ್ತು ಸನ್ಯಾಸಿಯ ವೇಷದಲ್ಲಿದ್ದ ಕಾರಣ, ಮೊದಲಿಗೆ ಯಾರಿಗೂ ಆತ ಯಾರೆಂದು ಗುರುತಿಸಲು ಸಾಧ್ಯವಾಗಲಿಲ್ಲ. ಆದರೆ, ಆತ ತನ್ನ ಸಾರಂಗಿಯ ನಾದಕ್ಕೆ ತನ್ನ ಬಾಲ್ಯ ಮತ್ತು ಕುಟುಂಬಕ್ಕೆ ಸಂಬಂಧಿಸಿದ ಹಾಡುಗಳನ್ನು ಹಾಡಲು ಪ್ರಾರಂಭಿಸಿದಾಗ, ಅಲ್ಲಿದ್ದ ಕುಟುಂಬ ಸದಸ್ಯರ ಕಣ್ಣಾಲಿಗಳು ತುಂಬಿ ಬಂದವು. ಆ ಸನ್ಯಾಸಿ ಬೇರಾರೂ ಅಲ್ಲ, ತಮ್ಮ ಕಳೆದುಹೋದ ಮಗನೇ ಎಂದು ಅವರಿಗೆ ಅರಿವಾಯಿತು. ತಮ್ಮ ಕುಟುಂಬ ಮತ್ತು ಗ್ರಾಮದ ಬಗ್ಗೆ ಆತ ಹೇಳುತ್ತಿದ್ದ ಕಥೆಗಳನ್ನು ಕೇಳಿ, ಆತ ಲಖನ್ ಶರ್ಮಾ ಎಂಬುದನ್ನು ಕುಟುಂಬದವರು ಖಚಿತಪಡಿಸಿಕೊಂಡರು. ಈ ಘಟನೆಯು ಸ್ಥಳೀಯರಲ್ಲಿ ಭಾವುಕ ವಾತಾವರಣವನ್ನು ಸೃಷ್ಟಿಸಿತು.
ಕುಟುಂಬ ಸದಸ್ಯರ ಪ್ರಕಾರ, 2003ರಲ್ಲಿ ತಂದೆಯ ಬೈಗುಳಕ್ಕೆ ಬೇಸತ್ತು 15 ವರ್ಷದ ಲಖನ್ ಶರ್ಮಾ ಮನೆ ಬಿಟ್ಟು ಹೋಗಿದ್ದನು. ಆತನ ಪತ್ತೆಗಾಗಿ ಸಾಕಷ್ಟು ಹುಡುಕಾಟ ನಡೆಸಿದರೂ ಸಿಗದಿದ್ದಾಗ, ಆತ ಮರಳಿ ಬರುವ ಆಸೆಯನ್ನು ಕುಟುಂಬದವರು ಕೈಬಿಟ್ಟಿದ್ದರು.
ಸೋಮವಾರ ಸಂಜೆ, ಕೈಯಲ್ಲಿ ಸಾರಂಗಿ ಹಿಡಿದು ಯೋಗಿಯ ವೇಷದಲ್ಲಿ ಲಖನ್ ಹಠಾತ್ತಾಗಿ ಗ್ರಾಮಕ್ಕೆ ಬಂದಿದ್ದನು. ಈ ವಿಷಯ ತಿಳಿಯುತ್ತಿದ್ದಂತೆಯೇ ಆತನ ಸಹೋದರಿ, ಬಾವ ಮತ್ತು ದೂರದ ಸಂಬಂಧಿಕರು ಸ್ಥಳಕ್ಕೆ ದೌಡಾಯಿಸಿದರು. ಪ್ರತಿಯೊಬ್ಬರೂ ಆತನಿಗೆ ಸನ್ಯಾಸತ್ವವನ್ನು ತೊರೆದು ಮನೆಗೆ ಮರಳುವಂತೆ ಮನವಿ ಮಾಡಿದರು.
ಆದರೆ, ಉತ್ತರ ಪ್ರದೇಶದ ಮಠವೊಂದರಲ್ಲಿ ದೀಕ್ಷೆ ಪಡೆದಿದ್ದ ಲಖನ್, ತಾನು ಈಗ ಆಧ್ಯಾತ್ಮಿಕ ಹಾದಿಯಲ್ಲಿದ್ದು, ತನ್ನ ನಿರ್ಧಾರದಿಂದ ಹಿಂದೆ ಸರಿಯುವುದಿಲ್ಲ ಎಂದು ಸ್ಪಷ್ಟಪಡಿಸಿದನು. ತಾನು ತನ್ನ ಪೋಷಕರಿಂದ ಭಿಕ್ಷೆಯನ್ನು ಸ್ವೀಕರಿಸಿದಾಗ ಮಾತ್ರ ತನ್ನ ಸನ್ಯಾಸ ಪ್ರಕ್ರಿಯೆ ಪೂರ್ಣಗೊಳ್ಳುತ್ತದೆ ಎಂದು ಲಖನ್ ಹೇಳಿದನು. ಇದನ್ನು ಕೇಳಿ ಕುಟುಂಬಸ್ಥರು ಮತ್ತಷ್ಟು ಭಾವುಕರಾದರು. ಅಂತಿಮವಾಗಿ, ತಂದೆ ದೀಪಕ್ ಶರ್ಮಾ ಅವರು ಭಾರವಾದ ಹೃದಯ ಮತ್ತು ಕಣ್ಣೀರಿನೊಂದಿಗೆ ತಮ್ಮ ಮಗನಿಗೆ ಭಿಕ್ಷೆ ನೀಡುವ ಮೂಲಕ ವಿದಾಯ ಹೇಳಿದರು. ಈ ಭಾವುಕ ದೃಶ್ಯವನ್ನು ಕಂಡ ಅಲ್ಲಿದ್ದ ಪ್ರತಿಯೊಬ್ಬರ ಕಣ್ಣುಗಳೂ ತೇವವಾದವು. ಈ ಘಟನೆಯು ಸದ್ಯ ಇಡೀ ಪ್ರದೇಶದಲ್ಲಿ ಚರ್ಚೆಯ ವಿಷಯವಾಗಿದೆ.
