ಆರ್ಟನ್ ಕ್ಯಾಪಿಟಲ್ಸ್ನ ಪಾಸ್ಪೋರ್ಟ್ ಇಂಡೆಕ್ಸ್ (Arton Capital’s Passport Index) ಬಿಡುಗಡೆ ಮಾಡಿರುವ ಹೊಸ ಅಂಕಿ-ಅಂಶಗಳ ಪ್ರಕಾರ, ಯುನೈಟೆಡ್ ಅರಬ್ ಎಮಿರೇಟ್ಸ್ (UAE) ಪ್ರಸ್ತುತ ವಿಶ್ವದ ಅತ್ಯಂತ ಶಕ್ತಿಶಾಲಿ ಪಾಸ್ಪೋರ್ಟ್ ಹೊಂದಿದೆ. ಯುಎಇ ದಾಖಲೆಯ 182 ಅಂಕಗಳನ್ನು ಗಳಿಸಿದ್ದು, ಇದು ಈ ಸೂಚ್ಯಂಕದ ಇತಿಹಾಸದಲ್ಲೇ ದಾಖಲಾದ ಅತಿ ಹೆಚ್ಚಿನ ಅಂಕವಾಗಿದೆ.
2018 ರಿಂದಲೂ ಯುಎಇ ಈ ಪಟ್ಟಿಯಲ್ಲಿ ಅಗ್ರಸ್ಥಾನವನ್ನು ಕಾಯ್ದುಕೊಂಡು ಬಂದಿದೆ. ಇತ್ತೀಚಿನ ಶ್ರೇಯಾಂಕಗಳು ವ್ಯಾಪಾರ, ಪ್ರವಾಸೋದ್ಯಮ ಮತ್ತು ರಾಜತಾಂತ್ರಿಕತೆಯಲ್ಲಿ ಯುಎಇ ಜಾಗತಿಕ ಪ್ರಭಾವ ದಿನೇ ದಿನೇ ಹೆಚ್ಚುತ್ತಿರುವುದನ್ನು ಎತ್ತಿ ತೋರಿಸುತ್ತವೆ.
ಯುಎಇ ಪಾಸ್ಪೋರ್ಟ್ ಹೊಂದಿರುವವರು ಈಗ ಎಂದಿಗಿಂತಲೂ ಹೆಚ್ಚಿನ ದೇಶಗಳು, ಪ್ರಮುಖ ಹಣಕಾಸು ಕೇಂದ್ರಗಳು ಮತ್ತು ಪ್ರವಾಸಿ ತಾಣಗಳಿಗೆ ಸುಲಭವಾಗಿ ಪ್ರಯಾಣಿಸಬಹುದಾಗಿದೆ. ವಿಶ್ವದ ಹಲವಾರು ದೇಶಗಳ ವೀಸಾ ಮುಕ್ತ ಪ್ರಯಾಣದ ಅವಕಾಶದಲ್ಲಿ ಯಾವುದೇ ಸುಧಾರಣೆ ಕಾಣದಿದ್ದರೂ ಅಥವಾ ಕುಸಿತ ಕಂಡಿದ್ದರೂ, ಯುಎಇ ಮಾತ್ರ ತನ್ನ ರಾಜತಾಂತ್ರಿಕ ಸಂಬಂಧಗಳು ಮತ್ತು ದ್ವಿಪಕ್ಷೀಯ ಒಪ್ಪಂದಗಳ ಮೂಲಕ ತನ್ನ ಜಾಗತಿಕ ಚಲನಶೀಲತೆಯನ್ನು ವಿಸ್ತರಿಸುತ್ತಲೇ ಸಾಗಿದೆ.
2017 ರಲ್ಲಿ ಯುಎಇ ವಿದೇಶಾಂಗ ವ್ಯವಹಾರಗಳ ಸಚಿವಾಲಯವು ‘ಯುಎಇ ಪಾಸ್ಪೋರ್ಟ್ ಫೋರ್ಸ್ ಇನಿಶಿಯೇಟಿವ್’ (UAE Passport Force Initiative) ಅನ್ನು ಪ್ರಾರಂಭಿಸಿದ ನಂತರ ಈ ಬೆಳವಣಿಗೆಯು ಅತ್ಯಂತ ಗಮನಾರ್ಹವಾಗಿದೆ. ಕೇವಲ 10 ವರ್ಷಗಳಿಗಿಂತ ಕಡಿಮೆ ಅವಧಿಯಲ್ಲಿ, ಈ ದೇಶವು 88 ನೇ ಸ್ಥಾನದಿಂದ ವಿಶ್ವದ ಅತ್ಯಂತ ಶಕ್ತಿಶಾಲಿ ಪಾಸ್ಪೋರ್ಟ್ ಹೊಂದಿರುವ ರಾಷ್ಟ್ರವಾಗಿ ಹೊರಹೊಮ್ಮಿದೆ. ಪಾಸ್ಪೋರ್ಟ್ ಇಂಡೆಕ್ಸ್ ವರ್ಷಗಳಿಂದ ಈ ಪ್ರಗತಿಯನ್ನು ಸೂಕ್ಷ್ಮವಾಗಿ ಗಮನಿಸಿ ದಾಖಲಿಸಿದೆ.
ಸಿಂಗಾಪುರವು 175 ಅಂಕಗಳೊಂದಿಗೆ ಶ್ರೇಯಾಂಕದಲ್ಲಿ ಎರಡನೇ ಸ್ಥಾನವನ್ನು ಕಾಯ್ದುಕೊಂಡಿದೆ. ಏಷ್ಯಾದ ಮತ್ತೊಂದು ದೇಶವಾದ ಮಲೇಷ್ಯಾ ಮಾತ್ರ ಪ್ರಮುಖ ವಿಭಾಗದಲ್ಲಿ ಉಳಿದುಕೊಂಡಿದ್ದು, 17 ನೇ ಸ್ಥಾನದಲ್ಲಿದೆ.
2026 ರಲ್ಲಿ ಜಾಗತಿಕ ಜಿಡಿಪಿ (GDP) ಬೆಳವಣಿಗೆಗೆ ಏಷ್ಯಾ ಖಂಡವು ಸುಮಾರು ಅರ್ಧದಷ್ಟು ಕೊಡುಗೆ ನೀಡುವ ನಿರೀಕ್ಷೆಯಿದ್ದರೂ, ಆ ಆರ್ಥಿಕ ಬೆಳವಣಿಗೆಯು ಪಾಸ್ಪೋರ್ಟ್ ಶ್ರೇಯಾಂಕದಲ್ಲಿ ಪ್ರತಿಫಲಿಸಿಲ್ಲ. ಜಪಾನ್ ಮತ್ತು ದಕ್ಷಿಣ ಕೊರಿಯಾ ಎರಡೂ ಈ ವರ್ಷ ನಾಲ್ಕು ಸ್ಥಾನಗಳ ಕುಸಿತ ಕಂಡಿವೆ. ದಕ್ಷಿಣ ಕೊರಿಯಾ ಅಗ್ರ 20 ರ ಪಟ್ಟಿಯಿಂದ ಸಂಪೂರ್ಣವಾಗಿ ಹೊರಬಿದ್ದಿದೆ.
ಈ ಮಧ್ಯೆ, ಯುರೋಪ್ ರಾಷ್ಟ್ರಗಳು ಅತ್ಯುನ್ನತ ಶ್ರೇಯಾಂಕದ ಪಾಸ್ಪೋರ್ಟ್ಗಳಲ್ಲಿ ತಮ್ಮ ದಬದಬಾವನ್ನು ಮುಂದುವರಿಸಿವೆ. ಸ್ಪೇನ್, ಬೆಲ್ಜಿಯಂ, ಲಕ್ಸೆಂಬರ್ಗ್, ಫ್ರಾನ್ಸ್ ಮತ್ತು ಡೆನ್ಮಾರ್ಕ್ ಸೇರಿದಂತೆ ಹಲವು ದೇಶಗಳು ವಿಶ್ವದ ಅತ್ಯಂತ ಶಕ್ತಿಶಾಲಿ ಪಾಸ್ಪೋರ್ಟ್ಗಳ ಪಟ್ಟಿಯಲ್ಲಿ ಉಳಿದುಕೊಂಡಿವೆ.
ಯುರೋಪ್ನಲ್ಲಿ ಪ್ರಮುಖ AI (ಕೃತಕ ಬುದ್ಧಿಮತ್ತೆ) ತಂತ್ರಜ್ಞಾನ ಕೇಂದ್ರವಾಗಲು ಪ್ರಯತ್ನಿಸುತ್ತಿರುವ ಲಕ್ಸೆಂಬರ್ಗ್, 174 ಅಂಕಗಳೊಂದಿಗೆ 10 ನೇ ಸ್ಥಾನದಿಂದ 5 ನೇ ಸ್ಥಾನಕ್ಕೆ ಏರುವ ಮೂಲಕ ದೊಡ್ಡ ಸುಧಾರಣೆ ಕಂಡಿದೆ. ಇದರ ಬೆಳವಣಿಗೆಯಿಂದಾಗಿ ಫಿನ್ಲ್ಯಾಂಡ್ ಕಳೆದ ವರ್ಷಕ್ಕೆ ಹೋಲಿಸಿದರೆ ಅಗ್ರ 10 ರ ಪಟ್ಟಿಯಿಂದ ಹೊರಬಿದ್ದಿದೆ.
ಪಾಸ್ಪೋರ್ಟ್ ಇಂಡೆಕ್ಸ್ ವರದಿಯ ಪ್ರಕಾರ, ಜಾಗತಿಕವಾಗಿ ದೇಶಗಳು ಎಷ್ಟು ಮುಕ್ತವಾಗಿವೆ ಎಂಬುದನ್ನು ಅಳೆಯುವ ‘ವರ್ಲ್ಡ್ ಓಪನ್ನೆಸ್ ಸ್ಕೋರ್’ (World Openness Score) 2026 ರಲ್ಲಿ ಮತ್ತೆ ಕುಸಿದಿದ್ದು, 2023 ರ ನಂತರದ ಅತ್ಯಂತ ಕನಿಷ್ಠ ಮಟ್ಟವನ್ನು ತಲುಪಿದೆ. ವಿವಿಧ ದೇಶಗಳು ವೀಸಾ ವ್ಯವಸ್ಥೆಗಳನ್ನು ಕಠಿಣಗೊಳಿಸುತ್ತಿರುವುದು, ಹೆಚ್ಚಿನ ಡಿಜಿಟಲ್ ಗಡಿ ನಿಯಂತ್ರಣಗಳನ್ನು ಜಾರಿಗೆ ತರುತ್ತಿರುವುದು ಮತ್ತು ಕೆಲವು ನಿರ್ದಿಷ್ಟ ರಾಷ್ಟ್ರೀಯತೆಗಳು ಹಾಗೂ ನುರಿತ ಕಾರ್ಮಿಕರ ಮೇಲೆ ಕಟ್ಟುನಿಟ್ಟಾದ ನಿಯಮಗಳನ್ನು ಹೇರುತ್ತಿರುವುದರಿಂದ ಈ ಕುಸಿತ ಉಂಟಾಗಿದೆ. 2025 ರಲ್ಲಿ 24 ದೇಶಗಳು ತಮ್ಮ ಚಲನಶೀಲತೆಯ ಅಂಕಗಳನ್ನು ಸುಧಾರಿಸಿಕೊಂಡಿದ್ದರೆ, 2026 ರಲ್ಲಿ ಕೇವಲ 11 ದೇಶಗಳು ಮಾತ್ರ ಸುಧಾರಣೆ ಕಂಡಿವೆ ಎಂದು ವರದಿ ತಿಳಿಸಿದೆ.
ಅತಿ ಹೆಚ್ಚು ಪ್ರವಾಸಿಗರನ್ನು ಸ್ವಾಗತಿಸುವ ದೇಶಗಳ (Welcoming Countries) ಶ್ರೇಯಾಂಕದಲ್ಲಿ ಆಸ್ಟ್ರೇಲಿಯಾ, ಅಮೆರಿಕ, ಕೆನಡಾ ಮತ್ತು ನ್ಯೂಜಿಲ್ಯಾಂಡ್ ದೇಶಗಳು ಕಠಿಣ ವೀಸಾ ನೀತಿಗಳು, ಬದಲಾಗುತ್ತಿರುವ ಗಡಿ ವ್ಯವಸ್ಥೆಗಳು ಮತ್ತು ಹೆಚ್ಚುತ್ತಿರುವ ಪಾಸ್ಪೋರ್ಟ್ ನಿರ್ಬಂಧಗಳಿಂದಾಗಿ ಕುಸಿತ ಕಂಡಿವೆ. ಆದಾಗ್ಯೂ, ಯುನೈಟೆಡ್ ಕಿಂಗ್ಡಮ್ (UK) ಕಡ್ಡಾಯ ಎಲೆಕ್ಟ್ರಾನಿಕ್ ಟ್ರಾವೆಲ್ ಆಥರೈಸೇಶನ್ (ETA) ಅನ್ನು ಪರಿಚಯಿಸಿದ ಹೊರತಾಗಿಯೂ ಎರಡು ಸ್ಥಾನಗಳನ್ನು ಮೇಲಕ್ಕೆರಿದೆ.
ಭಾರತದ ಶ್ರೇಯಾಂಕ:
ಭಾರತವು ಈ ಪಾಸ್ಪೋರ್ಟ್ ಇಂಡೆಕ್ಸ್ನಲ್ಲಿ ಗಾಂಬಿಯಾ, ರುವಾಂಡಾ, ಕ್ಯೂಬಾ ಮತ್ತು ಕಿರ್ಗಿಸ್ತಾನ್ ದೇಶಗಳೊಂದಿಗೆ ಜಂಟಿಯಾಗಿ 68ನೇ ಸ್ಥಾನದಲ್ಲಿದ್ದು, 72 ಅಂಕಗಳನ್ನು ಪಡೆದಿದೆ. ವರದಿಯ ಪ್ರಕಾರ, ಭಾರತೀಯ ಪಾಸ್ಪೋರ್ಟ್ ಹೊಂದಿರುವವರು 30 ದೇಶಗಳಿಗೆ ವೀಸಾ ರಹಿತವಾಗಿ (Visa-Free) ಪ್ರಯಾಣಿಸಬಹುದು, 42 ದೇಶಗಳಲ್ಲಿ ವೀಸಾ ಆನ್ ಅರೈವಲ್ (Visa-on-Arrival) ಸೌಲಭ್ಯವನ್ನು ಪಡೆಯಬಹುದು ಮತ್ತು 126 ದೇಶಗಳಿಗೆ ಮುಂಚಿತವಾಗಿ ವೀಸಾ ಪಡೆಯುವುದು ಕಡ್ಡಾಯವಾಗಿದೆ. ಇನ್ನು ನೆರೆಹೊರೆಯ ದೇಶಗಳ ಪೈಕಿ ಪಾಕಿಸ್ತಾನ 42 ಅಂಕಗಳೊಂದಿಗೆ 92ನೇ ಸ್ಥಾನದಲ್ಲಿದ್ದರೆ, ಬಾಂಗ್ಲಾದೇಶ 89ನೇ ಸ್ಥಾನದಲ್ಲಿದೆ.
ಶ್ರೇಯಾಂಕ (Rank) ದೇಶಗಳು (Countries) ಅಂಕಗಳು (Score)
1 ಯುನೈಟೆಡ್ ಅರಬ್ ಎಮಿರೇಟ್ಸ್ (UAE) 182
2 ಸಿಂಗಾಪುರ, ಸ್ಪೇನ್ 175
3 ಬೆಲ್ಜಿಯಂ, ಲಕ್ಸೆಂಬರ್ಗ್, ಫ್ರಾನ್ಸ್, ಡೆನ್ಮಾರ್ಕ್, ಜರ್ಮನಿ, ಸ್ವೀಡನ್, ನೆದರ್ಲ್ಯಾಂಡ್ಸ್, ಫಿನ್ಲ್ಯಾಂಡ್, ಇಟಲಿ, ಸ್ವಿಟ್ಜರ್ಲ್ಯಾಂಡ್, ಗ್ರೀಸ್, ಪೋರ್ಚುಗಲ್, ಆಸ್ಟ್ರಿಯಾ, ಮಲೇಷ್ಯಾ, ನಾರ್ವೆ, ಐರ್ಲೆಂಡ್ 174
4 ಮಾಲ್ಟಾ, ಪೋಲೆಂಡ್, ಹಂಗೇರಿ, ಲಾಟ್ವಿಯಾ, ದಕ್ಷಿಣ ಕೊರಿಯಾ, ಜಪಾನ್ 173
5 ರೊಮೇನಿಯಾ, ಸ್ಲೊವೇನಿಯಾ, ಚೆಕ್ ರಿಪಬ್ಲಿಕ್, ಕ್ರೊಯೇಷಿಯಾ, ಸ್ಲೋವಾಕಿಯಾ, ಬಲ್ಗೇರಿಯಾ, ಎಸ್ಟೋನಿಯಾ 172
6 ಸೈಪ್ರಸ್, ಲಿಥುವೇನಿಯಾ 171
7 ಯುನೈಟೆಡ್ ಕಿಂಗ್ಡಮ್ (UK), ಲಿಚ್ಟೆನ್ಸ್ಟೈನ್, ನ್ಯೂಜಿಲ್ಯಾಂಡ್ 170
8 ಕೆನಡಾ, ಐಸ್ಲ್ಯಾಂಡ್, ಆಸ್ಟ್ರೇಲಿಯಾ 169
9 ಅಮೆರಿಕ (USA), ಮೊನಾಕೊ 168
10 ಹಾಂಗ್ ಕಾಂಗ್ 164
