ಗೊಥೆನ್ಬರ್ಗ್ (ಸ್ವೀಡನ್): ಜಾಗತಿಕ ಮಟ್ಟದಲ್ಲಿ ಹೆಚ್ಚುತ್ತಿರುವ ರಾಜತಾಂತ್ರಿಕ ಅಸ್ಥಿರತೆ ಮತ್ತು ಪೂರೈಕೆ ಸರಪಳಿಯ (Supply Chain) ಬಿಕ್ಕಟ್ಟಿನ ನಡುವೆ, ಭಾರತ ಮತ್ತು ಯುರೋಪ್ ಒಟ್ಟಾಗಿ ಜಗತ್ತಿಗೆ ಹೊಸ ದಿಕ್ಸೂಚಿ ನೀಡಬಲ್ಲವು ಎಂದು ಪ್ರಧಾನಿ ನರೇಂದ್ರ ಮೋದಿ ಪ್ರತಿಪಾದಿಸಿದ್ದಾರೆ. ತಮ್ಮ ಐದು ದೇಶಗಳ ಅಧಿಕೃತ ಪ್ರವಾಸದ ಭಾಗವಾಗಿ ಸ್ವೀಡನ್ ತಲುಪಿರುವ ಪ್ರಧಾನಿ, “ಜಾಗತಿಕ ಸ್ಥಿರತೆ, ಸುಸ್ಥಿರತೆ ಹಾಗೂ ಹಂಚಿಕೆಯ ಪ್ರಗತಿಗೆ (Stability, Sustainability, Shared Prosperity) ಭಾರತ-ಯುರೋಪ್ ಪಾಲುದಾರಿಕೆಯು ಬಲಿಷ್ಠ ಸ್ತಂಭಗಳಾಗಬೇಕು” ಎಂದು ಕರೆ ನೀಡಿದ್ದಾರೆ.
ಸ್ವೀಡನ್ನ ಗೊಥೆನ್ಬರ್ಗ್ನಲ್ಲಿ ಆಯೋಜಿಸಲಾಗಿದ್ದ ಪ್ರತಿಷ್ಠಿತ ‘ಯುರೋಪಿಯನ್ ಇಂಡಸ್ಟ್ರಿ ರೌಂಡ್ಟೇಬಲ್’ (ERT) ಉದ್ಯಮಿಗಳ ಮಹಾಸಭೆಯನ್ನು ಉದ್ದೇಶಿಸಿ ಪ್ರಧಾನಿ ಮೋದಿ ಈ ಆಶಯ ವ್ಯಕ್ತಪಡಿಸಿದರು. ವೋಲ್ವೋ (Volvo) ಸಮೂಹ ಆಯೋಜಿಸಿದ್ದ ಈ ಹೈ-ಪ್ರೊಫೈಲ್ ಸಭೆಯಲ್ಲಿ ಸ್ವೀಡನ್ ಪ್ರಧಾನಿ ಉಲ್ಫ್ ಕ್ರಿಸ್ಟರ್ಸನ್ ಹಾಗೂ ಯುರೋಪಿಯನ್ ಕಮಿಷನ್ ಅಧ್ಯಕ್ಷೆ ಉರ್ಸುಲಾ ವಾನ್ ಡೆರ್ ಲೇಯನ್ ಸೇರಿದಂತೆ ಯುರೋಪ್ನ ದೈತ್ಯ ಕಂಪನಿಗಳ ಸಿಇಒಗಳು ಭಾಗವಹಿಸಿದ್ದರು.
ಪ್ರಸಕ್ತ ಜಾಗತಿಕ ವಿದ್ಯಮಾನಗಳನ್ನು ಉಲ್ಲೇಖಿಸಿ ಮಾತನಾಡಿದ ಪ್ರಧಾನಿ ಮೋದಿ, ಸದ್ಯದ ಪರಿಸ್ಥಿತಿಯಲ್ಲಿ ಉಭಯ ಶಕ್ತಿಗಳು ಕೈಜೋಡಿಸುವುದು ಇಡೀ ವಿಶ್ವಕ್ಕೆ ಅನಿವಾರ್ಯ ಎಂದರು.
- ಸವಾಲುಗಳ ಸರಣಿ: “ಇಂದಿನ ಜಗತ್ತು ಅನಿಶ್ಚಿತತೆಯಿಂದ ಕೂಡಿದೆ. ಪೂರೈಕೆ ಸರಪಳಿಗಳು ಒತ್ತಡದಲ್ಲಿವೆ, ತಾಂತ್ರಿಕ ಪೈಪೋಟಿ ತೀವ್ರಗೊಂಡಿದೆ ಮತ್ತು ಇಂಧನ ಭದ್ರತೆ ಹಾಗೂ ಹವಾಮಾನ ವೈಪರೀತ್ಯದ ಸವಾಲುಗಳು ಜಗತ್ತನ್ನು ಕಾಡುತ್ತಿವೆ. ಇಂತಹ ಸಂದರ್ಭದಲ್ಲಿ ಭಾರತ ಮತ್ತು ಯುರೋಪ್ ಜಂಟಿಯಾಗಿ ಬಲಿಷ್ಠ ಶಕ್ತಿಯಾಗಿ ನಿಲ್ಲಬೇಕಿದೆ,” ಎಂದು ಮೋದಿ ಹೇಳಿದರು.
- ಸ್ಟಾರ್ಟ್ಅಪ್ ಕ್ರಾಂತಿ: ಭಾರತವು ಇಂದು ವಿಶ್ವದಲ್ಲೇ 3ನೇ ಅತಿ ದೊಡ್ಡ ಸ್ಟಾರ್ಟ್ಅಪ್ ಪರಿಸರ ವ್ಯವಸ್ಥೆಯನ್ನು ಹೊಂದಿದೆ. ಕೃತಕ ಬುದ್ಧಿಮತ್ತೆ (AI), ಫಿನ್ಟೆಕ್, ಬಾಹ್ಯಾಕಾಶ (Space), ಡ್ರೋನ್ ಹಾಗೂ ಮೊಬಿಲಿಟಿ ಕ್ಷೇತ್ರಗಳಲ್ಲಿ ಭಾರತದ ಯುವಸಮುದಾಯ ಜಾಗತಿಕ ಮಟ್ಟದ ಪರಿಹಾರಗಳನ್ನು ಸೃಷ್ಟಿಸುತ್ತಿದೆ ಎಂದು ಪ್ರಧಾನಿ ಶ್ಲಾಘಿಸಿದರು.
