ನವದೆಹಲಿ: ಪಶ್ಚಿಮ ಬಂಗಾಳ, ಅಸ್ಸಾಂ, ಪುದುಚೇರಿ, ತಮಿಳುನಾಡು ಮತ್ತು ಕೇರಳದ ಮತದಾರರಿಗೆ ಪ್ರಧಾನಿ ನರೇಂದ್ರ ಮೋದಿ ಅವರು ಕೃತಜ್ಞತೆ ಸಲ್ಲಿಸಿದ್ದಾರೆ. ಚುನಾವಣಾ ಫಲಿತಾಂಶದ ಬಳಿಕ ಮಾತನಾಡಿದ ಅವರು, ಈ ಐದು ರಾಜ್ಯಗಳ ಜನತೆಗೆ ಗೌರವಪೂರ್ವಕವಾಗಿ ನಮಿಸುವುದಾಗಿ ತಿಳಿಸಿದರು.
ಕಾರ್ಯಕರ್ತರ ಶ್ರಮಕ್ಕೆ ಮೆಚ್ಚುಗೆ
ಬಿಜೆಪಿಯ ಕೋಟ್ಯಂತರ ಕಾರ್ಯಕರ್ತರನ್ನು ಅಭಿನಂದಿಸಿದ ಪ್ರಧಾನಿ, ಪ್ರತಿಯೊಬ್ಬ ಕಾರ್ಯಕರ್ತನು ಮತ್ತೊಮ್ಮೆ ಅದ್ಭುತ ಪ್ರದರ್ಶನ ನೀಡಿದ್ದಾನೆ ಎಂದು ಶ್ಲಾಘಿಸಿದರು. “ನಮ್ಮ ಕಾರ್ಯಕರ್ತರು ಕಮಲ ಅರಳುವಂತೆ ಮಾಡಿದ್ದಾರೆ, ಒಬ್ಬ ಪಕ್ಷದ ಕಾರ್ಯಕರ್ತನಾಗಿ ಅವರ ಈ ಸಂಭ್ರಮದಲ್ಲಿ ನಾನು ಭಾಗಿ” ಎಂದು ಅವರು ಹರ್ಷ ವ್ಯಕ್ತಪಡಿಸಿದರು.
ಉಜ್ವಲ ಭವಿಷ್ಯದ ಮುನ್ನುಡಿ
ಇಂದಿನ ದಿನವು ದೇಶದ ಉಜ್ವಲ ಭವಿಷ್ಯದ ಘೋಷಣೆಯಾಗಿದೆ ಎಂದು ಬಣ್ಣಿಸಿದ ಮೋದಿ, ಇದು ಭಾರತದ ಶ್ರೇಷ್ಠ ಪ್ರಜಾಪ್ರಭುತ್ವದ ಮೇಲಿಟ್ಟಿರುವ ವಿಶ್ವಾಸದ ದಿನವಾಗಿದೆ ಎಂದರು. “ಇದು ಕಾರ್ಯಕ್ಷಮತೆಯ ರಾಜಕಾರಣ (Politics of performance) ಮತ್ತು ‘ಏಕ ಭಾರತ ಶ್ರೇಷ್ಠ ಭಾರತ’ ಎಂಬ ತತ್ವದ ಮೇಲಿಟ್ಟಿರುವ ನಂಬಿಕೆಯನ್ನು ಪ್ರತಿಬಿಂಬಿಸುತ್ತದೆ” ಎಂದು ಪ್ರಧಾನಿ ಅಭಿಪ್ರಾಯಪಟ್ಟರು.
