ನವದೆಹಲಿ: ಜಾಗತಿಕವಾಗಿ ಯುದ್ಧದ ಕಾರ್ಮೋಡಗಳು ಮತ್ತು ಭೌಗೋಳಿಕ ರಾಜಕೀಯ ಅಸ್ಥಿರತೆ ಹೆಚ್ಚುತ್ತಿರುವ ಬೆನ್ನಲ್ಲೇ, ಭಾರತವು ತನ್ನ ರಕ್ಷಣಾ ಸಾಮರ್ಥ್ಯವನ್ನು ಮತ್ತಷ್ಟು ಬಲಪಡಿಸಿಕೊಂಡಿದೆ. 2025ನೇ ಸಾಲಿನಲ್ಲಿ ಭಾರತದ ಮಿಲಿಟರಿ ವೆಚ್ಚವು ಶೇ. 8.9ರಷ್ಟು ಏರಿಕೆಯಾಗಿದ್ದು, ಒಟ್ಟು 92.1 ಶತಕೋಟಿ ಡಾಲರ್ಗೆ (ಅಂದಾಜು ₹7.6 ಲಕ್ಷ ಕೋಟಿ) ತಲುಪಿದೆ ಎಂದು ಹೆಸರಾಂತ ಶಸ್ತ್ರಾಸ್ತ್ರ ಕಾವಲು ಸಂಸ್ಥೆ SIPRI ತನ್ನ ವರದಿಯಲ್ಲಿ ತಿಳಿಸಿದೆ.
ಮಿಲಿಟರಿ ವೆಚ್ಚದಲ್ಲಿ ಭಾರತವು ಜಗತ್ತಿನಲ್ಲೇ ಐದನೇ ಸ್ಥಾನವನ್ನು ಕಾಯ್ದುಕೊಂಡಿದೆ. ಅಮೆರಿಕ, ಚೀನಾ, ರಷ್ಯಾ ಮತ್ತು ಜರ್ಮನಿ ನಂತರದ ಸ್ಥಾನದಲ್ಲಿ ಭಾರತವಿದೆ. ಈ ಐದು ರಾಷ್ಟ್ರಗಳೇ ಜಗತ್ತಿನ ಒಟ್ಟು ಮಿಲಿಟರಿ ವೆಚ್ಚದ ಶೇ. 58ರಷ್ಟು ಪಾಲನ್ನು ಹೊಂದಿವೆ.
2025ರ ಮೇ ತಿಂಗಳಲ್ಲಿ ಭಾರತ ಮತ್ತು ಪಾಕಿಸ್ತಾನದ ನಡುವೆ ನಡೆದ ಸಂಘರ್ಷವು ರಕ್ಷಣಾ ವೆಚ್ಚದ ಏರಿಕೆಗೆ ಪ್ರಮುಖ ಕಾರಣ ಎನ್ನಲಾಗಿದೆ. ಈ ವೇಳೆ ಡ್ರೋನ್ಗಳು, ಕ್ಷಿಪಣಿಗಳು ಮತ್ತು ಯುದ್ಧ ವಿಮಾನಗಳ ಬಳಕೆಯಿಂದಾಗಿ ತುರ್ತು ಖರೀದಿಗಳು ಹೆಚ್ಚಾಗಿವೆ.
ಭಾರತೀಯ ಸೇನೆಯನ್ನು ‘ಆತ್ಮನಿರ್ಭರ’ ಯೋಜನೆಯಡಿ ಆಧುನೀಕರಿಸುತ್ತಿರುವುದು ಮತ್ತು ಹೊಸ ತಂತ್ರಜ್ಞಾನಗಳ ಅಳವಡಿಕೆಯೂ ವೆಚ್ಚದ ಹೆಚ್ಚಳಕ್ಕೆ ಕಾರಣವಾಗಿದೆ.
ವಿಶ್ವದಾದ್ಯಂತ ಮಿಲಿಟರಿ ವೆಚ್ಚವು ಶೇ. 2.9ರಷ್ಟು ಹೆಚ್ಚಳವಾಗಿದ್ದು, ಒಟ್ಟು 2,887 ಶತಕೋಟಿ ಡಾಲರ್ಗೆ ತಲುಪಿದೆ. ಇದು ಸತತ 11ನೇ ವರ್ಷದ ಏರಿಕೆಯಾಗಿದ್ದು, ಯುರೋಪ್ ಮತ್ತು ಏಷ್ಯಾ ರಾಷ್ಟ್ರಗಳು ತಮ್ಮ ರಕ್ಷಣಾ ಬಜೆಟ್ ಅನ್ನು ಗಣನೀಯವಾಗಿ ಹೆಚ್ಚಿಸಿವೆ.
