ಟೆಹ್ರಾನ್: ಪಶ್ಚಿಮ ಏಷ್ಯಾದಲ್ಲಿ ಅಮೆರಿಕ ಮತ್ತು ಇರಾನ್ ನಡುವಿನ ಸಂಘರ್ಷ ತಾರಕಕ್ಕೇರಿದ್ದು, ಆಯಕಟ್ಟಿನ ಪ್ರದೇಶವಾದ ಬಂದರ್ ಅಬ್ಬಾಸ್ ಬಂದರಿನ ಸಮೀಪ ಅಮೆರಿಕದ ಯುದ್ಧನೌಕೆಯೊಂದನ್ನು ಹೊಡೆದುರುಳಿಸಿರುವುದಾಗಿ ಇರಾನ್ ಸಶಸ್ತ್ರ ಪಡೆಗಳು ಮಂಗಳವಾರ (ಏಪ್ರಿಲ್ 14, 2026) ಪ್ರತಿಪಾದಿಸಿವೆ.
ಬಂದರ್ ಅಬ್ಬಾಸ್ ಬಂದರನ್ನು ಪ್ರವೇಶಿಸಲು ಯತ್ನಿಸುತ್ತಿದ್ದ ಅಮೆರಿಕದ ನೌಕಾಪಡೆಯ ಹಡಗಿನ ಮೇಲೆ ದಾಳಿ ನಡೆಸಲಾಗಿದ್ದು, ಅದು ಸಂಪೂರ್ಣವಾಗಿ ಬೆಂಕಿಗೆ ಆಹುತಿಯಾಗಿ ಮುಳುಗಿದೆ ಎಂದು ಇರಾನ್ ಮಾಧ್ಯಮಗಳು ವರದಿ ಮಾಡಿವೆ. ಈ ದಾಳಿಯದ್ದೆಂದು ಹೇಳಲಾದ ಸ್ಫೋಟದ ವಿಡಿಯೋ ತುಣುಕನ್ನು ಸಹ ಬಿಡುಗಡೆ ಮಾಡಲಾಗಿದೆ.
ಈ ಬೆಳವಣಿಗೆಯ ಬೆನ್ನಲ್ಲೇ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇರಾನ್ಗೆ ಕಠಿಣ ಎಚ್ಚರಿಕೆ ನೀಡಿದ್ದಾರೆ. ಅಮೆರಿಕ ವಿಧಿಸಿರುವ ನೌಕಾ ದಿಗ್ಬಂಧನವನ್ನು (Naval Blockade) ಉಲ್ಲಂಘಿಸುವ ಅಥವಾ ಅಮೆರಿಕದ ನೌಕೆಗಳ ಹತ್ತಿರ ಬರುವ ಯಾವುದೇ ಇರಾನಿ ಹಡಗುಗಳನ್ನು “ತಕ್ಷಣವೇ ನಿರ್ಮೂಲನೆ” ಮಾಡಲಾಗುವುದು ಎಂದು ಅವರು ಗುಡುಗಿದ್ದಾರೆ.
ಇರಾನ್ ಈ ಹಡಗು ಅಮೆರಿಕಕ್ಕೆ ಸೇರಿದ್ದೆಂದು ಹೇಳುತ್ತಿದ್ದರೂ, ವಾಷಿಂಗ್ಟನ್ನಿಂದ ಅಥವಾ ಅಮೆರಿಕದ ರಕ್ಷಣಾ ಇಲಾಖೆಯಿಂದ ಈ ಕುರಿತು ಯಾವುದೇ ಅಧಿಕೃತ ದೃಢೀಕರಣ ಲಭ್ಯವಾಗಿಲ್ಲ. ಈ ಹಕ್ಕು ಕೇವಲ ಪ್ರಚಾರದ ತಂತ್ರವೇ ಅಥವಾ ನಿಜವೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
