ಟೆಹ್ರಾನ್: ಪಶ್ಚಿಮ ಏಷ್ಯಾದಲ್ಲಿ ಮಹಾಯುದ್ಧದ ಕಾರ್ಮೋಡಗಳು ದಟ್ಟವಾಗಿವೆ. ಹಾರ್ಮುಜ್ ಜಲಸಂಧಿಯನ್ನು ತೆರೆಯಲು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೀಡಿದ್ದ 48 ಗಂಟೆಗಳ ಅಂತಿಮ ಗಡುವನ್ನು (Deadline) ಇರಾನ್ ‘ಅಸಹಾಯಕ ಮತ್ತು ಮೂರ್ಖತನದ ಕ್ರಮ’ ಎಂದು ವ್ಯಂಗ್ಯವಾಡಿದೆ. ಅಷ್ಟೇ ಅಲ್ಲದೆ, ಒಂದು ವೇಳೆ ಅಮೆರಿಕ ದಾಳಿ ಆರಂಭಿಸಿದರೆ ಅದು ‘ನರಕದ ಬಾಗಿಲು’ (Gates of Hell) ತೆರೆದಂತೆ ಎಂದು ಇರಾನ್ ಸೇನೆ ಎಚ್ಚರಿಸಿದೆ.
“ಟ್ರಂಪ್ ಅವರ ಬೆದರಿಕೆಗಳು ಕೇವಲ ಮಾನಸಿಕ ಯುದ್ಧದ ಭಾಗ. ಅಮೆರಿಕದ ಯಾವುದೇ ದುಸ್ಸಾಹಸಕ್ಕೆ ನಾವು ಸಿದ್ಧರಿದ್ದೇವೆ. ನಮ್ಮ ಮೇಲೆ ದಾಳಿಯಾದರೆ ಮಧ್ಯಪ್ರಾಚ್ಯದಲ್ಲಿರುವ ಅಮೆರಿಕದ ಎಲ್ಲಾ ಸೇನಾ ನೆಲೆಗಳನ್ನು ನಾವು ಗುರಿ ಮಾಡುತ್ತೇವೆ” ಎಂದು ಇರಾನ್ನ ರೆವಲ್ಯೂಷನರಿ ಗಾರ್ಡ್ಸ್ ಕಮಾಂಡರ್ ಗುಡುಗಿದ್ದಾರೆ.
ಹಾರ್ಮುಜ್ ಜಲಸಂಧಿಯ ಮೂಲಕ ತೈಲ ಸಾಗಣೆಗೆ ಅವಕಾಶ ನೀಡದಿದ್ದರೆ ಭೀಕರ ಪರಿಣಾಮ ಎದುರಿಸಬೇಕಾಗುತ್ತದೆ ಎಂದು ಟ್ರಂಪ್ ನೀಡಿದ್ದ ಗಡುವು ಈಗ ಅಂತಿಮ ಹಂತಕ್ಕೆ ತಲುಪಿದೆ.
ಜಾಗತಿಕ ಆತಂಕ: ಉಭಯ ದೇಶಗಳ ನಡುವಿನ ಈ ಮಾತಿನ ಚಕಮಕಿಯು ಯಾವುದೇ ಕ್ಷಣದಲ್ಲಿ ಕ್ಷಿಪಣಿ ದಾಳಿಯಾಗಿ ಮಾರ್ಪಡುವ ಭೀತಿ ಎದುರಾಗಿದೆ.
