ರಾಜ್ಯದ ಗ್ರಾಮ ಪಂಚಾಯಿತಿ ನೌಕರರೇ ಗಮನಿಸಿ : ವೇತನ, ಭತ್ಯೆ ಹಾಗೂ ವಿವಿಧ ಸೌಲಭ್ಯಗಳ ಸಂಪೂರ್ಣ ವಿವರ ಇಲ್ಲಿದೆ

ಬೆಂಗಳೂರು: ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆಯು ಗ್ರಾಮ ಪಂಚಾಯಿತಿ ನೌಕರರಿಗೆ ನೀಡಲಾಗುತ್ತಿರುವ ಕನಿಷ್ಠ ವೇತನ, ತುಟ್ಟಿಭತ್ಯೆ ಹಾಗೂ ಇತರ ಸೌಲಭ್ಯಗಳ ಅಧಿಕೃತ ವಿವರಗಳನ್ನು ಬಿಡುಗಡೆ ಮಾಡಿದೆ. ಕಾರ್ಮಿಕ ಇಲಾಖೆ ಕಾಲಕಾಲಕ್ಕೆ ನಿಗದಿಪಡಿಸುವ ಈ ವೇತನ ಹಾಗೂ ಭತ್ಯೆಗಳನ್ನು ಗ್ರಾಮ ಪಂಚಾಯಿತಿಗಳು ಪಾವತಿಸುತ್ತಿದ್ದು, ಇದರ ಸಂಪೂರ್ಣ ವಿವರಗಳು ಕೆಳಗಿನಂತಿವೆ.

ವಿವಿಧ ಹುದ್ದೆಗಳ ವೇತನ ವಿವರ (ರೂ.ಗಳಲ್ಲಿ):

ಕ್ಲೀನರ್ಸ್: ಒಟ್ಟು ವೇತನ ₹18,243.12 (ಕನಿಷ್ಠ ವೇತನ ₹16,019.52 + ತುಟ್ಟಿಭತ್ಯೆ ₹2,223.60)

ಬಿಲ್ ಕಲೆಕ್ಟರ್ / ಕ್ಲರ್ಕ್ ಕಂ ಡಾಟಾ ಎಂಟ್ರಿ ಆಪರೇಟರ್: ಒಟ್ಟು ವೇತನ ₹17,420.32 (ಕನಿಷ್ಠ ವೇತನ ₹15,196.72 + ತುಟ್ಟಿಭತ್ಯೆ ₹2,223.60)

ವಾಟರ್ ಆಪರೇಟರ್: ಒಟ್ಟು ವೇತನ ₹15,732.92 (ಕನಿಷ್ಠ ವೇತನ ₹13,509.32 + ತುಟ್ಟಿಭತ್ಯೆ ₹2,223.60)

ಅಟೆಂಡೆಂಟ್: ಒಟ್ಟು ವೇತನ ₹15,097.12 (ಕನಿಷ್ಠ ವೇತನ ₹12,873.52 + ತುಟ್ಟಿಭತ್ಯೆ ₹2,223.60)

ನೌಕರರಿಗೆ ಲಭ್ಯವಿರುವ ಇತರೆ ಪ್ರಮುಖ ಸೌಲಭ್ಯಗಳು:

ರಜೆ ಸೌಲಭ್ಯ: ಸಿಬ್ಬಂದಿಗೆ 10 ದಿನಗಳ ಸಾಂದರ್ಭಿಕ ರಜೆ ಹಾಗೂ 2 ದಿನಗಳ ನಿರ್ಬಂಧಿತ ರಜೆ ಲಭ್ಯವಿದೆ. ಮಹಿಳಾ ನೌಕರರಿಗೆ 180 ದಿನಗಳ ಪ್ರಸೂತಿ ರಜೆ ಮತ್ತು ಪುರುಷ ನೌಕರರಿಗೆ 15 ದಿನಗಳ ಪಿತೃತ್ವ ರಜೆ ನೀಡಲಾಗುತ್ತದೆ.

ನಿವೃತ್ತಿ ಮತ್ತು ಮರಣೋತ್ತರ ಉಪದಾನ: ನಿವೃತ್ತರಾಗುವ ಅಥವಾ ಸೇವೆಯಲ್ಲಿರುವಾಗ ಮರಣ ಹೊಂದುವ ನೌಕರರಿಗೆ, ಅವರು ಸಲ್ಲಿಸಿದ ಪ್ರತಿ ವರ್ಷದ ಸೇವೆಗೆ 15 ದಿನಗಳ ವೇತನದಂತೆ ಲೆಕ್ಕಹಾಕಿ, ಗರಿಷ್ಠ 20 ತಿಂಗಳ ವೇತನದ ಮಿತಿಗೆ ಒಳಪಟ್ಟು ಉಪದಾನ (Gratuity) ನೀಡಲಾಗುತ್ತದೆ.

ಶವಸಂಸ್ಕಾರಕ್ಕೆ ಆರ್ಥಿಕ ನೆರವು: ನೌಕರರು ಸೇವೆಯಲ್ಲಿರುವಾಗಲೇ ಮೃತಪಟ್ಟರೆ, ಅವರ ಅವಲಂಬಿತ ಕುಟುಂಬದ ಸದಸ್ಯರಿಗೆ ಶವಸಂಸ್ಕಾರಕ್ಕಾಗಿ ಗ್ರಾಮ ಪಂಚಾಯಿತಿ ನಿಧಿಯಿಂದ ₹10,000 ಗಳನ್ನು ನೀಡಲಾಗುತ್ತದೆ.

ಅನುಕಂಪದ ಆಧಾರದ ನೌಕರಿ: ಸೇವೆಯಲ್ಲಿರುವಾಗ ಮರಣ ಹೊಂದುವ ನೌಕರರ ನ್ಯಾಯಬದ್ಧ ಅವಲಂಬಿತರಿಗೆ ಅನುಕಂಪದ ಆಧಾರದ ಮೇಲೆ ನೌಕರಿ ಕಲ್ಪಿಸಲು ಅವಕಾಶ ಕಲ್ಪಿಸಲಾಗಿದೆ.

ವಿಮೆ ಹಾಗೂ ವೈದ್ಯಕೀಯ ನೆರವು:

ಪ್ರಧಾನ ಮಂತ್ರಿ ಜೀವನ ಜ್ಯೋತಿ, ಪ್ರಧಾನ ಮಂತ್ರಿ ಸುರಕ್ಷಾ ಜ್ಯೋತಿ ಹಾಗೂ ಎಸ್ಬಿಐ ಗ್ರೂಪ್ ಪರ್ಸನಲ್ ಆಕ್ಸಿಡೆಂಟ್ ಇನ್ಶೂರೆನ್ಸ್ ಪಾಲಿಸಿಗಳನ್ನು ಕಡ್ಡಾಯವಾಗಿ ಮಾಡಿಸಿ, ವೇತನ ಖಾತೆಗೆ ಲಿಂಕ್ ಮಾಡಲಾಗುತ್ತದೆ.

ಕ್ಯಾನ್ಸರ್, ಹೃದಯ ಶಸ್ತ್ರಚಿಕಿತ್ಸೆ, ಕಿಡ್ನಿ ಕಸಿಯಂತಹ ಗಂಭೀರ ಕಾಯಿಲೆಗಳ ಚಿಕಿತ್ಸೆಗೆ ₹50,000 ವರೆಗೆ ವೈದ್ಯಕೀಯ ವೆಚ್ಚವನ್ನು ಭರಿಸಲು ಆದೇಶಿಸಲಾಗಿದೆ.

ಕೋವಿಡ್-19 ಕರ್ತವ್ಯದ ವೇಳೆ ಮೃತಪಟ್ಟರೆ ₹30 ಲಕ್ಷ ಪರಿಹಾರ ಹಾಗೂ ಕೋವಿಡ್ ಚಿಕಿತ್ಸಾ ವೆಚ್ಚವನ್ನು ಭರಿಸುವ ಸೌಲಭ್ಯವಿದೆ.

ಬಡ್ತಿ ಮತ್ತು ಮೀಸಲಾತಿ:

ಗ್ರಾಮ ಪಂಚಾಯಿತಿಯಲ್ಲಿ ಬಿಲ್ ಕಲೆಕ್ಟರ್ ಮತ್ತು ಕ್ಲರ್ಕ್ ಹುದ್ದೆಗಳು ಖಾಲಿ ಇದ್ದಾಗ, ವಾಟರ್ ಆಪರೇಟರ್, ಅಟೆಂಡೆಂಟ್ ಹಾಗೂ ಕ್ಲೀನರ್ಸ್ಗಳಿಗೆ ಅವರ ಸೇವಾ ಜೇಷ್ಠತೆ ಮತ್ತು ಅರ್ಹತೆಯ ಆಧಾರದ ಮೇಲೆ ಬಡ್ತಿ ಹೊಂದಲು ಅವಕಾಶವಿದೆ.

ಗ್ರೇಡ್-2 ಕಾರ್ಯದರ್ಶಿ ಅಥವಾ ದ್ವಿತೀಯ ದರ್ಜೆ ಸಹಾಯಕರ (SDA) ನೇರ ನೇಮಕಾತಿಯಲ್ಲಿ, ಗ್ರಾಮ ಪಂಚಾಯಿತಿಯ ಬಿಲ್ ಕಲೆಕ್ಟರ್ ಹಾಗೂ ಕ್ಲರ್ಕ್ ಕಂ ಡಾಟಾ ಎಂಟ್ರಿ ಆಪರೇಟರ್ಗಳಿಗೆ ಶೇ. 50% ರಷ್ಟು ಮೀಸಲಾತಿ ನೀಡಲಾಗಿದೆ.

ಗಮನಿಸಬೇಕಾದ ಅಂಶ:
ಗ್ರಾಮ ಪಂಚಾಯಿತಿ ಸಿಬ್ಬಂದಿ ಸರ್ಕಾರಿ ನೌಕರರಲ್ಲದ ಕಾರಣ, ಅವರಿಗೆ ಸರ್ಕಾರಿ ನೌಕರರ ‘ಸಿ’ ಮತ್ತು ‘ಡಿ’ ದರ್ಜೆಯ ವೇತನ ಶ್ರೇಣಿಯನ್ನು ನೀಡಲು ಕಾನೂನಿನಲ್ಲಿ ಅವಕಾಶವಿರುವುದಿಲ್ಲ ಎಂದು ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆಯು (ಸಂಖ್ಯೆ: ಗ್ರಾಅಪ 682 ಗ್ರಾಪಂಅ 2024) ಸ್ಪಷ್ಟಪಡಿಸಿದೆ.