ಬೀದಿಗಳಲ್ಲಿ ಓಡಾಡುವಾಗ ನಾಯಿಗಳ ಹಿಂಡು ಏಕಾಏಕಿ ದಾಳಿ ಮಾಡುವುದು ಇತ್ತೀಚಿನ ದಿನಗಳಲ್ಲಿ ದೊಡ್ಡ ಆತಂಕಕ್ಕೆ ಕಾರಣವಾಗಿದೆ. ಪುಣೆಯಲ್ಲಿ ಮಹಿಳೆಯೊಬ್ಬರು ನಾಯಿಗಳ ದಾಳಿಯಿಂದಾಗಿ ಪ್ರಾಣ ಕಳೆದುಕೊಂಡ ಘಟನೆ ನಮ್ಮ ಕಣ್ಣಮುಂದಿದೆ. ಇಂತಹ ತುರ್ತು ಪರಿಸ್ಥಿತಿಯಲ್ಲಿ ಗಾಬರಿಯಾಗುವ ಬದಲು, ಬುದ್ಧಿವಂತಿಕೆಯಿಂದ ವರ್ತಿಸಿದರೆ ಪ್ರಾಣಾಪಾಯದಿಂದ ಪಾರಾಗಬಹುದು.
ಪಶು ತಜ್ಞರ ಪ್ರಕಾರ, ನಾಯಿಗಳು ದಾಳಿ ಮಾಡಲು ತನ್ನದೇ ಆದ ಕಾರಣಗಳನ್ನು ಹೊಂದಿರುತ್ತವೆ. ಹಾಗಾದರೆ, ನಾಯಿಗಳ ಹಿಂಡಿನಿಂದ ಪಾರಾಗುವುದು ಹೇಗೆ? ಈ ಕೆಳಗಿನ 5 ಅಂಶಗಳನ್ನು ನೆನಪಿಡಿ:
1. ಓಡಬೇಡಿ, ಸಂಪೂರ್ಣ ಶಾಂತರಾಗಿರಿ
ನಾಯಿಗಳು ಬೆನ್ನಟ್ಟಿದಾಗ ನಾವು ಭಯದಿಂದ ಓಡಲು ಶುರುಮಾಡುತ್ತೇವೆ. ಆದರೆ ಇದು ಅತ್ಯಂತ ಅಪಾಯಕಾರಿ. ನೀವು ಓಡಲು ಶುರುಮಾಡಿದರೆ, ನಾಯಿಗಳಿಗೆ ನಿಮ್ಮನ್ನು ಬೇಟೆಯಾಡುವ ಸಹಜ ಪ್ರವೃತ್ತಿ ಜಾಗೃತವಾಗುತ್ತದೆ. ಎಷ್ಟೇ ಭಯವಾದರೂ ಧೈರ್ಯ ತಂದುಕೊಂಡು ನಿಂತ ಜಾಗದಲ್ಲೇ ನಿಲ್ಲಿ ಅಥವಾ ಅತ್ಯಂತ ನಿಧಾನವಾಗಿ ಹೆಜ್ಜೆ ಹಾಕಿ. ನೀವು ಅವುಗಳಿಗೆ ಶತ್ರುವಲ್ಲ ಎಂಬ ಭಾವನೆ ಮೂಡಲಿ.
2. ಕಣ್ಣಿಗೆ ಕಣ್ಣಿಟ್ಟು ನೋಡಬೇಡಿ (Eye Contact)
ನಾಯಿಗಳ ಕಣ್ಣನ್ನು ನೇರವಾಗಿ ನೋಡುವುದು ಅವುಗಳಿಗೆ ನೀವು ಸವಾಲು ಹಾಕುತ್ತಿದ್ದೀರಿ ಅಥವಾ ದಾಳಿ ಮಾಡುತ್ತೀರಿ ಎಂಬ ಸಂಕೇತ ನೀಡುತ್ತದೆ. ಆದ್ದರಿಂದ ನಾಯಿಗಳ ಕಣ್ಣಿಗೆ ಕಣ್ಣಿಟ್ಟು ನೋಡಬೇಡಿ. ನಿಮ್ಮ ಕೈಗಳನ್ನು ಆಡಿಸಬೇಡಿ ಅಥವಾ ಕೂಗಾಡಬೇಡಿ. ಮುಖಭಾವವನ್ನು ಸಹಜವಾಗಿಟ್ಟುಕೊಂಡು ಅವುಗಳನ್ನು ನಿರ್ಲಕ್ಷಿಸುವಂತೆ ವರ್ತಿಸಿ.
3. ಸುರಕ್ಷಿತ ಅಂತರ ಕಾಯ್ದುಕೊಳ್ಳಿ
ನಾಯಿಗಳ ಹಿಂಡು ನಿಮ್ಮನ್ನು ಸುತ್ತುವರಿದಾಗ ಅವುಗಳ ತೀರಾ ಹತ್ತಿರ ಹೋಗಬೇಡಿ. ಗುಂಪಿನಲ್ಲಿರುವ ನಾಯಿಗಳು ಹೆಚ್ಚು ಆಕ್ರಮಣಕಾರಿಯಾಗಿರುತ್ತವೆ. ಅವುಗಳಿಗೂ ನಿಮಗೂ ನಡುವೆ ಬ್ಯಾಗ್, ಜಾಕೆಟ್ ಅಥವಾ ಕೊಡೆ ಅಡ್ಡ ಹಿಡಿಯಿರಿ. ಹಿಮ್ಮುಖವಾಗಿ ಚಲಿಸುವಾಗಲೂ ಬೆನ್ನು ತೋರಿಸದೆ ನಿಧಾನವಾಗಿ ಹಿಂದೆ ಸರಿಯಿರಿ.
4. ನಾಯಿಗಳ ವರ್ತನೆಯನ್ನು ಗಮನಿಸಿ
ನಾಯಿಗಳು ತಮ್ಮ ದೇಹದ ಮೂಲಕ ಕೆಲವು ಸಂಕೇತಗಳನ್ನು ನೀಡುತ್ತವೆ. ನಾಯಿ ಹಲ್ಲಿನಿಂದ ತುಟಿಗಳನ್ನು ನೆಕ್ಕುತ್ತಿದ್ದರೆ ಅಥವಾ ನಿಮ್ಮ ಕಡೆಯಿಂದ ದೃಷ್ಟಿ ಸರಿಸುತ್ತಿದ್ದರೆ ಅದರ ಕೋಪ ಕಡಿಮೆಯಾಗುತ್ತಿದೆ ಎಂದರ್ಥ. ಅಂತಹ ಸಂದರ್ಭದಲ್ಲಿ ಅದು ನಿಮ್ಮನ್ನು ವಾಸನೆ ನೋಡಲು ಬಂದರೆ ತಡೆಯಬೇಡಿ, ಅದು ನಿಮ್ಮನ್ನು ಪರಿಶೀಲಿಸಿ ಸುಮ್ಮನಾಗಬಹುದು.
5. ತುರ್ತು ಸಂದರ್ಭದಲ್ಲಿ ವಸ್ತುವನ್ನು ಅಡ್ಡ ಇಡಿ
ನಾಯಿ ಕಚ್ಚಲು ಮುಂದಾದರೆ ನಿಮ್ಮ ಬಳಿ ಇರುವ ಯಾವುದಾದರೂ ವಸ್ತುವನ್ನು (ಬ್ಯಾಗ್, ಹೆಲ್ಮೆಟ್ ಅಥವಾ ಕಲ್ಲು) ಅದರ ಬಾಯಿಗೆ ಸಿಗುವಂತೆ ಮಾಡಿ. ಇದರಿಂದ ಅದು ನಿಮ್ಮ ದೇಹವನ್ನು ಕಚ್ಚುವ ಬದಲು ಆ ವಸ್ತುವನ್ನು ಕಚ್ಚುತ್ತದೆ. ತಕ್ಷಣ ಸ್ಥಳೀಯರ ಸಹಾಯಕ್ಕಾಗಿ ಕೂಗಿರಿ.
ನಾಯಿಗಳು ಏಕೆ ದಾಳಿ ಮಾಡುತ್ತವೆ?
ಪ್ರದೇಶದ ರಕ್ಷಣೆ: ನಾಯಿಗಳು ತಮ್ಮ ಏರಿಯಾವನ್ನು ಬಹಳ ಗಂಭೀರವಾಗಿ ಪರಿಗಣಿಸುತ್ತವೆ. ಬೇರೆ ಏರಿಯಾದ ನಾಯಿ ಅಥವಾ ಅಪರಿಚಿತ ವ್ಯಕ್ತಿ ಬಂದಾಗ ಅವುಗಳಿಗೆ ಬೆದರಿಕೆ ಎನಿಸಬಹುದು.
ಹಸಿವು: ಹಸಿವಿನಿಂದ ಇರುವ ನಾಯಿಗಳು ಹೆಚ್ಚು ಕೋಪದಲ್ಲಿರುತ್ತವೆ.
ವಾಹನಗಳ ಮೇಲೆ ದಾಳಿ: ಒಂದು ಪ್ರದೇಶದ ನಾಯಿಗಳು ಬೇರೊಂದು ಪ್ರದೇಶದ ವಾಹನದ ಟೈರ್ಗಳ ಮೇಲೆ ಮೂತ್ರ ವಿಸರ್ಜನೆ ಮಾಡಿ ಗಂಧ ಬಿಟ್ಟಿರುತ್ತವೆ. ಆ ವಾಹನ ಮತ್ತೊಂದು ಏರಿಯಾಕ್ಕೆ ಹೋದಾಗ ಅಲ್ಲಿನ ನಾಯಿಗಳಿಗೆ ಅದು ‘ವೈರಿ’ ನಾಯಿಯ ವಾಸನೆ ಎಂದು ಭಾಸವಾಗಿ ದಾಳಿ ಮಾಡುತ್ತವೆ.
ನಾಯಿ ಕಚ್ಚಿದರೆ ಏನು ಮಾಡಬೇಕು?
ಒಂದು ವೇಳೆ ನಾಯಿ ಕಚ್ಚಿದರೆ, ತಕ್ಷಣವೇ ಆ ಗಾಯವನ್ನು ಹರಿಯುವ ನೀರಿನಲ್ಲಿ ಕನಿಷ್ಠ 10-15 ನಿಮಿಷಗಳ ಕಾಲ ಸೋಪು ಬಳಸಿ ತೊಳೆಯಿರಿ. ಯಾವುದೇ ವಿಳಂಬ ಮಾಡದೆ ವೈದ್ಯರ ಬಳಿ ಹೋಗಿ ರೇಬಿಸ್ ಲಸಿಕೆ ಪಡೆಯಿರಿ.
