ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ (AI) ಈಗ ಕೇವಲ ಕಚೇರಿ ಕೆಲಸಗಳಿಗೆ ಸೀಮಿತವಾಗಿಲ್ಲ, ಅದು ಜನರ ಬೆಡ್ರೂಮ್ಗಳಿಗೂ ಲಗ್ಗೆ ಇಟ್ಟಿದೆ. ಗ್ಲೀಡನ್-ಇಪ್ಸೋಸ್ (Gleeden-IPSOS) ಸಂಸ್ಥೆಗಳು ಭಾರತದ ಟೈರ್-1 ಮತ್ತು ಟೈರ್-2 ನಗರಗಳ 1500 ಜನರ ಮೇಲೆ ನಡೆಸಿದ ಇತ್ತೀಚಿನ ಸಮೀಕ್ಷೆಯು ಆಘಾತಕಾರಿ ವಿಷಯಗಳನ್ನು ಹೊರಹಾಕಿದೆ.
ಭಾರತದಲ್ಲಿ ಶೇ. 46 ರಷ್ಟು ಜನರು AI ಜೊತೆಗಿನ ಶೃಂಗಾರಭರಿತ ಮತ್ತು ಭಾವನಾತ್ಮಕ ಸಂಭಾಷಣೆಗಳಿಗೆ ವ್ಯಸನಿಗಳಾಗುತ್ತಿದ್ದಾರೆ. ಇದು ಅಶ್ಲೀಲ ಚಿತ್ರಗಳಿಗೆ (Porn) ದಾಸರಾಗುವಷ್ಟೇ ಗಂಭೀರವಾಗಿದೆ ಎಂದು ಈ ಅಧ್ಯಯನ ತಿಳಿಸಿದೆ.
ಮನುಷ್ಯರ ಸ್ಥಾನ ತುಂಬುತ್ತಿದ್ದಾನೆಯೇ ‘ಡಿಜಿಟಲ್ ಗೆಳೆಯ’?
ಸಮೀಕ್ಷೆಯ ಪ್ರಕಾರ, AI ಈಗ ಕೇವಲ ತಂತ್ರಜ್ಞಾನವಾಗಿ ಉಳಿದಿಲ್ಲ, ಅದೊಂದು ಸಾಮೀಪ್ಯದ ಸಾಧನವಾಗಿ (Intimacy Tool) ಬದಲಾಗಿದೆ.
ಶೇ. 63 ರಷ್ಟು ಜನರು ತಮ್ಮ ಡೇಟಿಂಗ್ ಕೌಶಲ್ಯಗಳನ್ನು ಹೆಚ್ಚಿಸಿಕೊಳ್ಳಲು AI ಬಳಸುತ್ತಿದ್ದಾರೆ.
ಶೇ. 60 ರಷ್ಟು ಮಂದಿ ಶೃಂಗಾರಕ್ಕೆ ಸಂಬಂಧಿಸಿದ ಸಲಹೆಗಳಿಗಾಗಿ ಇದರ ಮೇಲೆ ಅವಲಂಬಿತರಾಗಿದ್ದಾರೆ.
ಶೇ. 64 ರಷ್ಟು ಜನರು ತಮ್ಮ ಸಂಬಂಧಗಳಲ್ಲಿನ ಸಮಸ್ಯೆಗಳನ್ನು ಬಗೆಹರಿಸಿಕೊಳ್ಳಲು AI ಸಹಾಯ ಪಡೆಯುತ್ತಿದ್ದಾರೆ.
ಅಚ್ಚರಿಯ ವಿಷಯವೆಂದರೆ, ಶೇ. 54 ರಷ್ಟು ಜನರು ವರ್ಚುವಲ್ AI ಪಾಲುದಾರರನ್ನು ಸೃಷ್ಟಿಸಿಕೊಂಡು ಅವರೊಂದಿಗೆ ಲೈಂಗಿಕ ಅನುಭವಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. ಸುಮಾರು ಶೇ. 58 ರಷ್ಟು ಮಂದಿ ರೊಮ್ಯಾಂಟಿಕ್ ಮೆಸೇಜ್ ಹಾಗೂ ಸಾಂಗತ್ಯಕ್ಕಾಗಿ AI ಮೊರೆ ಹೋಗುತ್ತಿದ್ದಾರೆ.
ನೈತಿಕತೆ vs ತಂತ್ರಜ್ಞಾನ: ಇದು ವಂಚನೆಯೇ?
ಸಮೀಕ್ಷೆಯಲ್ಲಿ ಭಾಗವಹಿಸಿದವರ ಪೈಕಿ ಶೇ. 49 ರಷ್ಟು ಜನರು ತಮ್ಮ ನಿಜ ಜೀವನದ ಸಂಗಾತಿಗಿಂತ AI ಜೊತೆಗಿನ ವರ್ಚುವಲ್ ರೊಮ್ಯಾನ್ಸ್ಗೆ ಒಮ್ಮೆಯಾದರೂ ಆದ್ಯತೆ ನೀಡಿರುವುದಾಗಿ ಒಪ್ಪಿಕೊಂಡಿದ್ದಾರೆ. ಆದರೆ, ಇದರಲ್ಲಿ ಒಂದು ಮಾನಸಿಕ ಸಂಘರ್ಷವೂ ಇದೆ:
ವಂಚನೆ: AI ಜೊತೆ ಇಂತಹ ಚಾಟಿಂಗ್ ಮಾಡುವುದು ‘ಚೀಟಿಂಗ್’ ಅಥವಾ ಸಂಗಾತಿಗೆ ಮಾಡುವ ದ್ರೋಹ ಎಂದು ಶೇ. 65 ರಷ್ಟು ಮಂದಿ ಅಭಿಪ್ರಾಯಪಟ್ಟಿದ್ದಾರೆ.
ನೋವು: ಒಂದು ವೇಳೆ ತಮ್ಮ ಸಂಗಾತಿ AI ಜೊತೆ ಇಂತಹ ಶೃಂಗಾರಭರಿತ ಚಾಟಿಂಗ್ ಮಾಡಿದರೆ ಅದನ್ನು ಅರಗಿಸಿಕೊಳ್ಳಲು ಸಾಧ್ಯವಿಲ್ಲ ಎಂದು ಶೇ. 70 ರಷ್ಟು ಮಂದಿ ಹೇಳಿದ್ದಾರೆ.
ಗೌಪ್ಯತೆ: ಯಾರೂ ಕೂಡ ತಮ್ಮ AI ಚಾಟ್ ಹಿಸ್ಟರಿಯನ್ನು ಇತರರಿಗೆ ತೋರಿಸಲು ಇಷ್ಟಪಡುತ್ತಿಲ್ಲ.
ದೀಪ್ಫೇಕ್ (Deepfake) ಎಂಬ ಹೊಸ ಆತಂಕ
ಕೇವಲ ಚಾಟಿಂಗ್ಗೆ ಸೀಮಿತವಾಗದೆ, ಅಪಾಯಕಾರಿ ಮಟ್ಟಕ್ಕೆ ತಂತ್ರಜ್ಞಾನ ಬಳಕೆಯಾಗುತ್ತಿದೆ. ಶೇ. 49 ರಷ್ಟು ಜನರು ಸೆಲೆಬ್ರಿಟಿಗಳು ಅಥವಾ ತಮಗೆ ಪರಿಚಯವಿರುವ ವ್ಯಕ್ತಿಗಳ ಮುಖಗಳನ್ನು ಬಳಸಿ AI ಮೂಲಕ ‘ದೀಪ್ಫೇಕ್’ ಅಶ್ಲೀಲ ಚಿತ್ರಗಳನ್ನು ಸೃಷ್ಟಿಸಿರುವುದಾಗಿ ಒಪ್ಪಿಕೊಂಡಿದ್ದಾರೆ. ಇದು ಕಾನೂನುಬಾಹಿರ ಹಾಗೂ ಅನೈತಿಕವಾಗಿದ್ದು, ತಂತ್ರಜ್ಞಾನವು ನಿಯಮಗಳಿಗಿಂತ ವೇಗವಾಗಿ ಸಮಾಜದ ಮೇಲೆ ದಾಳಿ ಮಾಡುತ್ತಿರುವುದಕ್ಕೆ ಸಾಕ್ಷಿಯಾಗಿದೆ.
