ನವದೆಹಲಿ: ಭಾರತದ ಮನೆಮಾತಾಗಿರುವ ಖ್ಯಾತ ಮಸಾಲೆ ಬ್ರ್ಯಾಂಡ್ ‘ಎವರೆಸ್ಟ್’ (Everest) ಇದೀಗ ಭಾರಿ ವಿವಾದಕ್ಕೆ ಸಿಲುಕಿದೆ. ಎವರೆಸ್ಟ್ನ ಪ್ರಮುಖ ಮಸಾಲೆ ಉತ್ಪನ್ನಗಳು ಗುಣಮಟ್ಟದ ಪರೀಕ್ಷೆಯಲ್ಲಿ ವಿಫಲವಾಗಿವೆ ಎಂಬ ಆಘಾತಕಾರಿ ಅಂಶವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
ಏನಿದು ಪ್ರಕರಣ?
‘ಟ್ರಸ್ಟಿಫೈಡ್’ (Trustified) ಎಂಬ ಯೂಟ್ಯೂಬ್ ಚಾನೆಲ್ ಮಾರ್ಚ್ 1, 2026 ರಂದು ವೀಡಿಯೊವೊಂದನ್ನು ಅಪ್ಲೋಡ್ ಮಾಡಿದ್ದು, ಇದರಲ್ಲಿ ಎವರೆಸ್ಟ್ ಕಂಪನಿಯ ಮಸಾಲೆ ಪದಾರ್ಥಗಳ ಪ್ರಯೋಗಾಲಯ ವರದಿಯನ್ನು ಬಹಿರಂಗಪಡಿಸಿದೆ. ಡಿ-ಮಾರ್ಟ್ನಿಂದ ಖರೀದಿಸಲಾದ ವಿವಿಧ ಮಸಾಲೆ ಪ್ಯಾಕೆಟ್ಗಳನ್ನು ಸ್ವತಂತ್ರ ಪ್ರಯೋಗಾಲಯಕ್ಕೆ ಪರೀಕ್ಷೆಗೆ ಕಳುಹಿಸಲಾಗಿತ್ತು. ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ನಿಗದಿಪಡಿಸಿದ ಸುರಕ್ಷತಾ ಮಾನದಂಡಗಳನ್ನು ಈ ಉತ್ಪನ್ನಗಳು ಮೀರಿವೆ ಎಂದು ವರದಿ ಹೇಳಿದೆ.
ಯಾವ ಉತ್ಪನ್ನಗಳಲ್ಲಿ ಏನೇನಿದೆ?
ವರದಿಯ ಪ್ರಕಾರ, ನಾಲ್ಕು ಪ್ರಮುಖ ಉತ್ಪನ್ನಗಳಲ್ಲಿ ಕೀಟನಾಶಕ ಹಾಗೂ ಬ್ಯಾಕ್ಟೀರಿಯಾಗಳ ಅಂಶ ಪತ್ತೆಯಾಗಿದೆ:
ಎವರೆಸ್ಟ್ ಗರಂ ಮಸಾಲ: ಇದರಲ್ಲಿ ಅಸೆಟಾಮಿಪ್ರಿಡ್ ಮತ್ತು ಅಜೋಕ್ಸಿಸ್ಟ್ರೋಬಿನ್ ಎಂಬ ಕೀಟನಾಶಕಗಳು ನಿಗದಿತ ಮಿತಿಗಿಂತ ಹೆಚ್ಚಾಗಿವೆ. ಜೊತೆಗೆ ಎಂಟರೊಬ್ಯಾಕ್ಟೀರಿಯೇಸಿಯೇ (Enterobacteriaceae) ಎಂಬ ಬ್ಯಾಕ್ಟೀರಿಯಾ ಕೂಡ ಪತ್ತೆಯಾಗಿದೆ.
ಎವರೆಸ್ಟ್ ಕಿಚನ್ ಕಿಂಗ್ ಮಸಾಲ: ಇದರಲ್ಲಿ ಥಯಾಮೆಥೋಕ್ಸಾಮ್, ಕಾರ್ಬೆಂಡಾಜಿಮ್ ಮತ್ತು ಬೆನೊಮಿಲ್ ಎಂಬ ಮೂರು ಕೀಟನಾಶಕಗಳು ಮತ್ತು ಬ್ಯಾಕ್ಟೀರಿಯಾಗಳು ಪತ್ತೆಯಾಗಿವೆ.
ಎವರೆಸ್ಟ್ ಕಾಶ್ಮೀರಿ ಲಾಲ್ ಚಿಲ್ಲಿ ಪೌಡರ್: ಕೀಟನಾಶಕಗಳು ಮಿತಿಯಲ್ಲಿದ್ದರೂ, ಬ್ಯಾಕ್ಟೀರಿಯಾಗಳ ಸಂಖ್ಯೆ ಹೆಚ್ಚಿರುವುದು ಕಂಡುಬಂದಿದೆ.
ಎವರೆಸ್ಟ್ ಮೀಟ್ ಮಸಾಲ: ಇದರಲ್ಲಿ ಎಥಿಯಾನ್, ಟೆಬುಕೊನಜೋಲ್, ಅಜೋಕ್ಸಿಸ್ಟ್ರೋಬಿನ್ ಮತ್ತು ಫ್ಲೂಪಿರಾಮ್ ಸೇರಿದಂತೆ ಹಲವು ಕೀಟನಾಶಕಗಳು ಹಾಗೂ ಬ್ಯಾಕ್ಟೀರಿಯಾಗಳ ಅಂಶ ಸುರಕ್ಷಿತ ಮಿತಿಯನ್ನು ಮೀರಿವೆ.
ಆರೋಗ್ಯದ ಮೇಲೆ ಏನು ಪರಿಣಾಮ?
ಈ ಕುರಿತು ಸಾಮಾಜಿಕ ಜಾಲತಾಣ ‘X’ ನಲ್ಲಿ ಎಐ ಚಾಟ್ಬಾಟ್ ‘ಗ್ರೋಕ್’ (Grok) ನೀಡಿದ ಮಾಹಿತಿಯ ಪ್ರಕಾರ, ಎಂಟರೊಬ್ಯಾಕ್ಟೀರಿಯೇಸಿಯೇ ಗುಂಪಿನ ಬ್ಯಾಕ್ಟೀರಿಯಾಗಳು (E.coli ಮತ್ತು ಸಾಲ್ಮೊನೆಲ್ಲಾ ಸೇರಿದಂತೆ) ಮಾನವನ ಆರೋಗ್ಯಕ್ಕೆ ಅಪಾಯಕಾರಿ.
ಇವು ಹೊಟ್ಟೆಯ ಸೋಂಕನ್ನು ಉಂಟುಮಾಡಬಹುದು.
ಅತಿಸಾರ (Diarrhoea), ವಾಂತಿ, ಹೊಟ್ಟೆ ನೋವು ಮತ್ತು ತೀವ್ರ ಆಹಾರ ವಿಷದ (Food Poisoning) ಲಕ್ಷಣಗಳು ಕಾಣಿಸಿಕೊಳ್ಳಬಹುದು.
ಲಕ್ಷಾಂತರ ಕುಟುಂಬಗಳು ಪ್ರತಿದಿನ ಬಳಸುವ ಎವರೆಸ್ಟ್ ಮಸಾಲೆಯ ಬಗ್ಗೆ ಇಂತಹ ವರದಿ ಬಂದಿರುವುದು ಗ್ರಾಹಕರಲ್ಲಿ ಆತಂಕ ಮೂಡಿಸಿದೆ. ಆಹಾರ ಸುರಕ್ಷತಾ ಇಲಾಖೆಯು ಈ ಬಗ್ಗೆ ಮುಂದಿನ ದಿನಗಳಲ್ಲಿ ಯಾವ ಕ್ರಮ ಕೈಗೊಳ್ಳಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
