ನವದೆಹಲಿ: ದೇಶದ ಜನಸಾಮಾನ್ಯರಿಗೆ, ಅದರಲ್ಲೂ ವಿಶೇಷವಾಗಿ ಆರ್ಥಿಕವಾಗಿ ಹಿಂದುಳಿದವರಿಗೆ ಕೇಂದ್ರ ಸರ್ಕಾರ ಸಿಹಿ ಸುದ್ದಿ ನೀಡಿದೆ. ಪ್ರಧಾನ ಮಂತ್ರಿ ಜನಧನ್ ಯೋಜನೆ (PMJDY) ಸೇರಿದಂತೆ ಸುಮಾರು 72 ಕೋಟಿ ‘ಮೂಲ ಉಳಿತಾಯ ಬ್ಯಾಂಕ್ ಠೇವಣಿ’ (BSBDA) ಖಾತೆಗಳಿಗೆ ಕನಿಷ್ಠ ಬ್ಯಾಲೆನ್ಸ್ ಕಾಯ್ದುಕೊಳ್ಳದಿದ್ದಲ್ಲಿ ಯಾವುದೇ ದಂಡ ವಿಧಿಸಲಾಗುವುದಿಲ್ಲ ಎಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಸ್ಪಷ್ಟಪಡಿಸಿದ್ದಾರೆ.
ಸೋಮವಾರ ಲೋಕಸಭೆಯಲ್ಲಿ ಕೇಳಲಾದ ಪ್ರಶ್ನೆಯೊಂದಕ್ಕೆ ಲಿಖಿತ ಉತ್ತರ ನೀಡಿದ ಅವರು, ಬ್ಯಾಂಕಿಂಗ್ ವ್ಯವಸ್ಥೆಯಿಂದ ಹೊರಗುಳಿದಿರುವ ಮತ್ತು ಸಣ್ಣ ಉಳಿತಾಯಗಾರರನ್ನು ತಲುಪುವ ಉದ್ದೇಶದಿಂದ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ತಿಳಿಸಿದರು.
72 ಕೋಟಿ ಖಾತೆದಾರರಿಗೆ ಲಾಭ: ಜನಧನ್ ಖಾತೆಗಳು ಸೇರಿದಂತೆ ದೇಶದ ಒಟ್ಟು 72 ಕೋಟಿ ಬಿಎಸ್ಬಿಡಿಎ (BSBDA) ಖಾತೆಗಳಿಗೆ ಶೂನ್ಯ ಬ್ಯಾಲೆನ್ಸ್ (Zero Balance) ಸೌಲಭ್ಯವಿದೆ. ಇವಕ್ಕೆ ಯಾವುದೇ ಕನಿಷ್ಠ ಮೊತ್ತದ ಮಿತಿ ಇರುವುದಿಲ್ಲ.
ಉಚಿತ ಸೇವೆಗಳು: ಈ ಖಾತೆದಾರರು ಹಣ ಜಮಾ ಮಾಡುವುದು, ಹಿಂಪಡೆಯುವುದು ಮತ್ತು ಎಟಿಎಂ ಸೇವೆಯನ್ನು ಯಾವುದೇ ದಂಡ ಅಥವಾ ಶುಲ್ಕವಿಲ್ಲದೆ ಉಚಿತವಾಗಿ ಪಡೆಯಬಹುದು.
ದಂಡ ಯಾರಿಗೆ ಅನ್ವಯ?: ಸಾಮಾನ್ಯ ಉಳಿತಾಯ ಖಾತೆಗಳು ಮತ್ತು ಚಾಲ್ತಿ ಖಾತೆದಾರರು ಬ್ಯಾಂಕ್ ನಿಗದಿಪಡಿಸಿದ ‘ಮಾಸಿಕ ಸರಾಸರಿ ಕನಿಷ್ಠ ಬ್ಯಾಲೆನ್ಸ್’ (MAB) ಕಾಯ್ದುಕೊಳ್ಳುವುದು ಕಡ್ಡಾಯ. ತಪ್ಪಿದಲ್ಲಿ ಆಯಾ ಬ್ಯಾಂಕ್ಗಳ ನಿಯಮದಂತೆ ದಂಡ ವಿಧಿಸಲಾಗುತ್ತದೆ.
ಬ್ಯಾಂಕ್ಗಳ ಆದಾಯ: ಕಳೆದ 2022-23ರಿಂದ 2024-25ರ ಹಣಕಾಸು ವರ್ಷದ ಅವಧಿಯಲ್ಲಿ, ಕನಿಷ್ಠ ಬ್ಯಾಲೆನ್ಸ್ ಕಾಯ್ದುಕೊಳ್ಳದ ಕಾರಣಕ್ಕಾಗಿ ಸಾರ್ವಜನಿಕ ವಲಯದ ಬ್ಯಾಂಕ್ಗಳು (PSBs) ಗ್ರಾಹಕರಿಂದ ಒಟ್ಟು 8,092.83 ಕೋಟಿ ರೂಪಾಯಿ ದಂಡವನ್ನು ಸಂಗ್ರಹಿಸಿವೆ ಎಂದು ಸಚಿವರು ಮಾಹಿತಿ ನೀಡಿದರು.
ಗಮನಿಸಿ: ಆರ್ಬಿಐ (RBI) ಮಾರ್ಗಸೂಚಿಯಂತೆ, ಬ್ಯಾಂಕ್ಗಳು ವಿಧಿಸುವ ದಂಡವು ಸಮಂಜಸವಾಗಿರಬೇಕು ಮತ್ತು ಸೇವೆ ಒದಗಿಸಲು ತಗಲುವ ವೆಚ್ಚಕ್ಕೆ ಅನುಗುಣವಾಗಿ ಪಾರದರ್ಶಕವಾಗಿರಬೇಕು ಎಂಬ ನಿಯಮವಿದೆ.
