ಬೆಂಗಳೂರು: ಸ್ವಂತ ಜಮೀನು ಅಥವಾ ಹೊಲವನ್ನು ಖರೀದಿಸುವುದು ಪ್ರತಿಯೊಬ್ಬರ ಕನಸು. ಆದರೆ ಸರಿಯಾದ ದಾಖಲೆಗಳ ಪರಿಶೀಲನೆ ನಡೆಸದೆ ಆತುರದಲ್ಲಿ ಜಮೀನು ಖರೀದಿಸಿದರೆ, ಭವಿಷ್ಯದಲ್ಲಿ ಕಾನೂನು ಸಂಘರ್ಷ ಹಾಗೂ ಆರ್ಥಿಕ ನಷ್ಟ ಅನುಭವಿಸಬೇಕಾಗಬಹುದು. ಆಸ್ತಿ ವ್ಯವಹಾರದಲ್ಲಿ ವಂಚನೆಗೊಳಗಾಗದಂತೆ ತಡೆಯಲು ಖರೀದಿದಾರರು ಮುಖ್ಯವಾಗಿ ಈ ಕೆಳಗಿನ 12 ದಾಖಲೆಗಳನ್ನು ಕಡ್ಡಾಯವಾಗಿ ಪರಿಶೀಲಿಸಬೇಕು ಎಂದು ತಜ್ಞರು ಸಲಹೆ ನೀಡಿದ್ದಾರೆ.
ಪರಿಶೀಲಿಸಬೇಕಾದ 12 ಪ್ರಮುಖ ದಾಖಲೆಗಳು:
ಜಮೀನಿನ ಮಾಲೀಕತ್ವ ಮತ್ತು ಕಾನೂನುಬದ್ಧತೆಯನ್ನು ಖಚಿತಪಡಿಸಿಕೊಳ್ಳಲು ಈ ಪಟ್ಟಿಯನ್ನು ಅನುಸರಿಸಿ:
1 ಆರ್ಟಿಸಿ (RTC – ಪಹಣಿ): ಜಮೀನಿನ ಮಾಲೀಕರು ಯಾರು, ವಿಸ್ತೀರ್ಣ ಎಷ್ಟು ಮತ್ತು ಬೆಳೆಗಳ ವಿವರ ತಿಳಿಯಲು ಇದು ಮುಖ್ಯ.
2. ಮ್ಯುಟೇಶನ್ ರಿಜಿಸ್ಟರ್ (Mutation Register): ಜಮೀನಿನ ಮಾಲೀಕತ್ವವು ಒಬ್ಬರಿಂದ ಒಬ್ಬರಿಗೆ ಹೇಗೆ ವರ್ಗಾವಣೆಯಾಗಿದೆ ಎಂಬ ಹಸ್ತಾಂತರದ ಇತಿಹಾಸವನ್ನು ಇದು ತೋರಿಸುತ್ತದೆ.
3 ಅಟ್ಲಾಸ್ ಅಥವಾ ನಕ್ಷೆ (Akarband/Atlas): ಜಮೀನಿನ ಆಕಾರ ಮತ್ತು ಗಡಿಗಳನ್ನು ಗುರುತಿಸಲು ಕಂದಾಯ ಇಲಾಖೆಯ ಈ ನಕ್ಷೆ ಅಗತ್ಯ.
4 ಋಣಭಾರ ಪ್ರಮಾಣಪತ್ರ (Encumbrance Certificate – EC): ಕಳೆದ 15 ರಿಂದ 30 ವರ್ಷಗಳಲ್ಲಿ ಜಮೀನಿನ ಮೇಲೆ ಯಾವುದೇ ಸಾಲ ಅಥವಾ ಕಾನೂನು ವ್ಯಾಜ್ಯಗಳು ಇಲ್ಲದಿರುವುದನ್ನು ಖಚಿತಪಡಿಸಿಕೊಳ್ಳಲು ಇದು ಬೇಕು.
5 ಕ್ರಯ ಪತ್ರ (Sale Deed): ಹಿಂದಿನ ಮಾಲೀಕರು ಜಮೀನನ್ನು ಹೇಗೆ ಪಡೆದರು ಎಂಬುದಕ್ಕೆ ಇದು ಮೂಲ ಸಾಕ್ಷಿ.
6 ಗ್ರಾಮ ನಕ್ಷೆ (Village Map): ಜಮೀನು ಯಾವ ಸರ್ವೇ ನಂಬರ್ನಲ್ಲಿದೆ ಮತ್ತು ಅದರ ಸುತ್ತಮುತ್ತಲಿನ ಪರಿಸರ ತಿಳಿಯಲು ಇದು ಸಹಕಾರಿ.
7 ತೆರಿಗೆ ಪಾವತಿ ರಶೀದಿ (Tax Paid Receipts): ಜಮೀನಿನ ಮೇಲಿನ ಕಂದಾಯವನ್ನು ನಿಯಮಿತವಾಗಿ ಸರ್ಕಾರಕ್ಕೆ ಪಾವತಿಸಲಾಗಿದೆಯೇ ಎಂದು ಪರಿಶೀಲಿಸಿ.
8 ಪರಿವರ್ತನಾ ಪ್ರಮಾಣಪತ್ರ (Conversion Certificate): ಕೃಷಿ ಜಮೀನನ್ನು ಕೃಷಿಯೇತರ ಉದ್ದೇಶಕ್ಕೆ (NA) ಬಳಸುತ್ತಿದ್ದರೆ, ಅದರ ಅಧಿಕೃತ ದಾಖಲೆ ಇರಬೇಕು.
9 ಸರ್ವೇ ಸ್ಕೆಚ್ (11E Sketch): ಜಮೀನಿನ ನಿಖರವಾದ ಅಳತೆ ಮತ್ತು ವಿಭಾಗಗಳನ್ನು ತಿಳಿಯಲು ಇದು ಅತ್ಯಗತ್ಯ.
10 ವಾರಸುದಾರರ ಪಟ್ಟಿ (Family Tree): ಮೂಲ ಮಾಲೀಕರು ಮೃತಪಟ್ಟಿದ್ದರೆ, ಅವರ ಕಾನೂನುಬದ್ಧ ವಾರಸುದಾರರು ಯಾರು ಎಂಬ ವಿವರ ಬೇಕು.
11 ಖಾತಾ ಪ್ರಮಾಣಪತ್ರ (Khata Certificate): ಆಸ್ತಿಯನ್ನು ನೋಂದಣಿ ಮಾಡುವ ಮೊದಲು ಅದು ಯಾರ ಹೆಸರಿನಲ್ಲಿ ಖಾತೆ ಆಗಿದೆ ಎಂಬುದು ಮುಖ್ಯ.
12 ಭೂಸ್ವಾಧೀನ ಪ್ರಕ್ರಿಯೆಯ ಮಾಹಿತಿ: ಜಮೀನು ಯಾವುದೇ ಸರ್ಕಾರಿ ಯೋಜನೆಗಳಿಗೆ (KIADB, BDA ಇತ್ಯಾದಿ) ಸ್ವಾಧೀನವಾಗುತ್ತಿಲ್ಲ ಎಂದು ಖಚಿತಪಡಿಸಿಕೊಳ್ಳಿ.
ಹೆಚ್ಚುವರಿ ಮುನ್ನೆಚ್ಚರಿಕೆಗಳು:
ಕೇವಲ ದಾಖಲೆಗಳು ಸರಿಯಾಗಿದ್ದರೆ ಸಾಲದು, ಈ ಕೆಳಗಿನ ಕ್ರಮಗಳನ್ನು ಅನುಸರಿಸುವುದು ಕ್ಷೇಮ ಎಂದು ವರದಿಯಲ್ಲಿ ತಿಳಿಸಲಾಗಿದೆ:
ಕಾನೂನು ಸಲಹೆ (Legal Opinion): ಅನುಭವಿ ವಕೀಲರಿಂದ ಎಲ್ಲಾ ದಾಖಲೆಗಳನ್ನು ಪರಿಶೀಲಿಸಿ ‘ಲೀಗಲ್ ಒಪಿನಿಯನ್’ ಪಡೆಯುವುದು ಉತ್ತಮ.
ಸ್ಥಳ ಪರಿಶೀಲನೆ: ಸರ್ಕಾರಿ ಸರ್ವೆಯರ್ ಮೂಲಕ ಜಮೀನನ್ನು ಅಳತೆ ಮಾಡಿಸಿ, ನಕ್ಷೆಯಲ್ಲಿರುವಂತೆ ಗಡಿಗಳು ಸರಿಯಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳಿ.
ಅಧಿಕೃತ ಕಚೇರಿಗಳ ಭೇಟಿ: ಈ ಎಲ್ಲಾ ದಾಖಲೆಗಳನ್ನು ಸಂಬಂಧಪಟ್ಟ ತಹಸೀಲ್ದಾರ್ ಕಚೇರಿ, ಉಪ ನೋಂದಣಾಧಿಕಾರಿ ಕಚೇರಿ ಅಥವಾ ನಾಡಕಚೇರಿಯಿಂದಲೇ ಅಧಿಕೃತವಾಗಿ ಪಡೆದು ಪರಿಶೀಲಿಸಿ.
ನೆನಪಿಡಿ: ಜಮೀನು ವ್ಯವಹಾರದಲ್ಲಿ ಸ್ವಲ್ಪ ಯಾಮಾರಿದರೂ ನಿಮ್ಮ ಕಷ್ಟದ ದುಡಿಮೆ ಕೈತಪ್ಪಬಹುದು. ಆದ್ದರಿಂದ ‘ನಂಬಿಕೆ’ಗಿಂತ ‘ದಾಖಲೆ’ಗಳಿಗೆ ಮೊದಲ ಆದ್ಯತೆ ನೀಡಿ.
ಅವಿನಾಶ್ ಆರ್. ಭೀಮಸಂದ್ರ
