ನವದೆಹಲಿ: ಕೃತಕ ಬುದ್ಧಿಮತ್ತೆಯ ತ್ವರಿತ ಪ್ರಗತಿಯಿಂದಾಗಿ ಪ್ರಸ್ತುತ 90 ದಶಲಕ್ಷಕ್ಕೂ ಹೆಚ್ಚು ಟೆಕ್ ಉದ್ಯೋಗಗಳು ಅಪಾಯದಲ್ಲಿವೆ ಎಂದು ಇನ್ಫೋಸಿಸ್ ಅಧ್ಯಕ್ಷ ನಂದನ್ ನಿಲೇಕಣಿ ಅವರು ತಂತ್ರಜ್ಞಾನ ಕ್ಷೇತ್ರದ ಭವಿಷ್ಯದ ಬಗ್ಗೆ ಸ್ಪಷ್ಟ ಎಚ್ಚರಿಕೆ ನೀಡಿದ್ದಾರೆ.
ಬೆಂಗಳೂರಿನಲ್ಲಿ ನಡೆದ ‘ಇನ್ಫೋಸಿಸ್ ಎಐ ಇನ್ವೆಸ್ಟರ್ ಡೇ 2026’ ರಲ್ಲಿ ಮಾತನಾಡಿದ ನಂದನ್ ನಿಲೇಕಣಿ ಅವರು, ಪ್ರಸ್ತುತ ನಡೆಯುತ್ತಿರುವ ಎಐ ಕ್ರಾಂತಿಯು ಹಿಂದೆಂದೂ ಕಾಣದ ರೀತಿಯಲ್ಲಿ ವ್ಯವಹಾರದ ಕಾರ್ಯಾಚರಣೆಗಳನ್ನು ಮರುರೂಪಿಸುತ್ತಿದೆ ಎಂದು ಒತ್ತಿಹೇಳಿದರು.
ಸಾಂಪ್ರದಾಯಿಕ ಉದ್ಯೋಗಗಳ ಅಂತ್ಯ:
ನಿಲೇಕಣಿ ಅವರ ವಿಶ್ಲೇಷಣೆಯ ಪ್ರಕಾರ, ನಿರ್ದಿಷ್ಟ ಕೆಲಸಗಳಿಗಾಗಿ ಭಾರತದಾದ್ಯಂತ ನೇಮಕಗೊಂಡಿದ್ದ ಲಕ್ಷಾಂತರ ತಂತ್ರಜ್ಞರ ಅಗತ್ಯತೆ ಈಗ ಇಲ್ಲದಂತಾಗುತ್ತಿದೆ. “ಕೋಡ್ ಬರೆಯುವುದನ್ನೇ ಗುರಿಯಾಗಿಸಿಕೊಂಡಿದ್ದ ಕಾಲ” ಮುಗಿಯುತ್ತಿದೆ, ಏಕೆಂದರೆ ಎಐ ಈಗ ದೈನಂದಿನ ಡೆವಲಪ್ಮೆಂಟ್ ಕೆಲಸಗಳನ್ನು ಮನುಷ್ಯರಿಗಿಂತ ಹೆಚ್ಚು ದಕ್ಷತೆಯಿಂದ ನಿರ್ವಹಿಸುತ್ತಿದೆ. ಈ ಬದಲಾವಣೆಯು ಐಟಿ ಉದ್ಯಮದ ಪ್ರತಿಭೆಗಳನ್ನು ಹಳೆಯ ಸಿಸ್ಟಮ್ಗಳಿಂದ ‘ಎಐ-ನೇಟಿವ್’ (AI-native) ಆರ್ಕಿಟೆಕ್ಚರ್ಗಳತ್ತ ಕೊಂಡೊಯ್ಯುತ್ತಿದೆ.
9 ಕೋಟಿ ಉದ್ಯೋಗ ನಷ್ಟ, 17 ಕೋಟಿ ಹೊಸ ಅವಕಾಶ:
90 ಮಿಲಿಯನ್ (9 ಕೋಟಿ) ಉದ್ಯೋಗಗಳು ಅಪಾಯದಲ್ಲಿದ್ದರೂ, ಈ ಎಐ ಪರಿವರ್ತನೆಯು ವಿಶ್ವಾದ್ಯಂತ ಕನಿಷ್ಠ 170 ಮಿಲಿಯನ್ (17 ಕೋಟಿ) ಹೊಸ ಉದ್ಯೋಗಗಳನ್ನು ಸೃಷ್ಟಿಸಲಿದೆ ಎಂದು ನಿಲೇಕಣಿ ಭವಿಷ್ಯ ನುಡಿದ್ದಾರೆ. ಈ ಹಿಂದೆ ಫ್ರಂಟ್-ಎಂಡ್ ಡೆವಲಪ್ಮೆಂಟ್, ಕ್ಯೂಎ (QA) ಟೆಸ್ಟಿಂಗ್ ಮತ್ತು ಐಟಿ ಸಪೋರ್ಟ್ನಲ್ಲಿ ಕೆಲಸ ಮಾಡುತ್ತಿದ್ದ ಎಂಜಿನಿಯರ್ಗಳು ಜಾಗತಿಕ ಆರ್ಥಿಕತೆಯಲ್ಲಿ ಉಳಿಯಲು ಹೊಸ ಪರಿಣತಿಯತ್ತ ಗಮನ ಹರಿಸುವಂತೆ ಅವರು ಸೂಚಿಸಿದ್ದಾರೆ.
ಐಟಿ ಉದ್ಯಮವನ್ನು ಮರುರೂಪಿಸಲಿರುವ 5 ಹೊಸ ಉದ್ಯೋಗಗಳು
ಲಿಂಕ್ಡ್ಇನ್ ಮತ್ತು ಸ್ಟ್ಯಾನ್ಫೋರ್ಡ್ ಎಐ ಇಂಡೆಕ್ಸ್ ವರದಿ 2025 ರ ಪ್ರಕಾರ, ಪ್ರಸ್ತುತ ಈ ಕೆಳಗಿನ ಐದು ಎಐ ಪಾತ್ರಗಳಿಗೆ ಅತಿ ಹೆಚ್ಚು ಬೇಡಿಕೆ ಇದೆ:
* ಎಐ ಎಂಜಿನಿಯರ್ಗಳು (AI Engineers): ಇವರು ಕಂಪನಿಗಳ ಕೆಲಸದ ದಕ್ಷತೆಯನ್ನು ಹೆಚ್ಚಿಸಲು ಲಾರ್ಜ್ ಲ್ಯಾಂಗ್ವೇಜ್ ಮಾಡೆಲ್ಗಳನ್ನು (LLMs) ನಿರ್ಮಿಸುವ ಕೆಲಸ ಮಾಡುತ್ತಾರೆ.
* ಎಐ ಫೋರೆನ್ಸಿಕ್ ಅನಲಿಸ್ಟ್ಗಳು (AI Forensic Analysts): ಎಐ ಮಾದರಿಗಳಲ್ಲಿನ ತಾರತಮ್ಯವನ್ನು ಪತ್ತೆಹಚ್ಚಲು ಮತ್ತು ಸೈಬರ್ ಘಟನೆಗಳ ಡಿಜಿಟಲ್ ಸಾಕ್ಷ್ಯಗಳನ್ನು ತನಿಖೆ ಮಾಡಲು ಇವರು ಮಿಷನ್ ಲರ್ನಿಂಗ್ ಬಳಸುತ್ತಾರೆ.
* ಫಾರ್ವರ್ಡ್-ಡಿಪ್ಲಾಯ್ಡ್ ಎಂಜಿನಿಯರ್ಗಳು (Forward-Deployed Engineers): ಇವರು ಆಸ್ಪತ್ರೆಗಳು ಅಥವಾ ಬ್ಯಾಂಕ್ಗಳಂತಹ ಕ್ಲೈಂಟ್ಗಳ ಜೊತೆ ನೇರವಾಗಿ ಕೆಲಸ ಮಾಡಿ, ಅವರಿಗೆ ಅಗತ್ಯವಿರುವ ಎಐ ಪರಿಹಾರಗಳನ್ನು ಅಳವಡಿಸಿಕೊಡುತ್ತಾರೆ.
* ಏಜೆಂಟಿಕ್ ವರ್ಕ್ಫ್ಲೋ ಆರ್ಕಿಟೆಕ್ಟ್ಗಳು (Agentic Workflow Architects): ಸಪ್ಲೈ ಚೈನ್ ಟ್ರ್ಯಾಕಿಂಗ್ನಂತಹ ಸಂಪೂರ್ಣ ವ್ಯವಹಾರ ಪ್ರಕ್ರಿಯೆಗಳನ್ನು ಸ್ವಯಂಚಾಲಿತವಾಗಿ ನಿರ್ವಹಿಸಬಲ್ಲ “ಎಐ ವರ್ಕರ್ಸ್” (AI Workers) ಅನ್ನು ಇವರು ವಿನ್ಯಾಸಗೊಳಿಸುತ್ತಾರೆ.
* ಡೇಟಾ ಅನೋಟರ್ಗಳು (Data Annotators): ಡೇಟಾವನ್ನು ಸ್ವಚ್ಛಗೊಳಿಸುವ ಮತ್ತು ಲೇಬಲ್ ಮಾಡುವ ಜವಾಬ್ದಾರಿ ಇವರದ್ದು. ಈಗ ಇದಕ್ಕೆ ವೈದ್ಯಕೀಯ ಅಥವಾ ಕಾನೂನಿನಂತಹ ನಿರ್ದಿಷ್ಟ ಕ್ಷೇತ್ರದ ಪರಿಣತಿಯ ಅಗತ್ಯವಿದೆ.
ಎಐ ನೇಮಕಾತಿಯಲ್ಲಿ ಭಾರತವೇ ವಿಶ್ವಕ್ಕೆ ಮಾದರಿ
ಈ ಮಹತ್ವದ ಬದಲಾವಣೆಯಲ್ಲಿ ಭಾರತವು ಜಾಗತಿಕ ಕೇಂದ್ರವಾಗಿ ಹೊರಹೊಮ್ಮಿದೆ ಎಂದು ದತ್ತಾಂಶಗಳು ತಿಳಿಸುತ್ತವೆ.
* ನೇಮಕಾತಿ ಹೆಚ್ಚಳ: ಸ್ಟ್ಯಾನ್ಫೋರ್ಡ್ ವರದಿಯ ಪ್ರಕಾರ, ಭಾರತದಲ್ಲಿ ಎಐ ನೇಮಕಾತಿಯು ವರ್ಷದಿಂದ ವರ್ಷಕ್ಕೆ 33.4% ರಷ್ಟು ಏರಿಕೆಯಾಗಿದೆ, ಇದು ಜಾಗತಿಕವಾಗಿ ಅತಿ ಹೆಚ್ಚು.
* ಕೌಶಲ್ಯದ ಪ್ರಭಾವ: ಭಾರತದಲ್ಲಿ ಎಐ ಕೌಶಲ್ಯಗಳ ಪ್ರಭಾವವು ಜಾಗತಿಕ ಸರಾಸರಿಗಿಂತ 2.5 ಪಟ್ಟು ಹೆಚ್ಚಿದೆ. ಬೆಂಗಳೂರು ಮತ್ತು ಹೈದರಾಬಾದ್ ನಗರಗಳು ಎಐ ಉದ್ಯೋಗಾವಕಾಶಗಳಲ್ಲಿ ದೇಶವನ್ನೇ ಮುನ್ನಡೆಸುತ್ತಿವೆ.
* ಹೊಸ ಉದ್ಯೋಗಗಳು: ಲಿಂಕ್ಡ್ಇನ್ 2026 ರ ವರದಿಯ ಪ್ರಕಾರ, ಭಾರತದಲ್ಲಿ ‘ಪ್ರಾಪ್ಟ್ ಎಂಜಿನಿಯರ್’ (Prompt Engineer) ಅತಿ ವೇಗವಾಗಿ ಬೆಳೆಯುತ್ತಿರುವ ಉದ್ಯೋಗವಾಗಿದೆ.
