ನವದೆಹಲಿ : ಉತ್ತರ ಪ್ರದೇಶದ ಮೌ ಜಿಲ್ಲೆಯ ಜಿಲ್ಲಾ ಕಾರಾಗೃಹದಲ್ಲಿ ಆರೋಗ್ಯ ತಪಾಸಣೆಯ ಸಮಯದಲ್ಲಿ ಐವರು ಕೈದಿಗಳು ಎಚ್‌ಐವಿ ಸೋಂಕಿಗೆ ಒಳಗಾಗಿರುವುದು ಕಂಡುಬಂದಿದೆ.
ಕಳೆದ ಒಂದು ವಾರದಲ್ಲಿ ಜೈಲಿನ ಐದು ಕೈದಿಗಳಿಗೆ ಎಚ್‌ಐವಿ ಸೋಂಕು ತಗುಲಿರುವುದು ದೃಢಪಟ್ಟಿದೆ ಎಂದು ಮೌ ಜಿಲ್ಲಾ ಕಾರಾಗೃಹದ ಜೈಲರ್ ರಾಜೇಶ್ ಕುಮಾರ್ ಮತ್ತು ಜಿಲ್ಲಾ ಕಾರಾಗೃಹದ ಔಷಧಿಕಾರ ಅಜಯ್ ಕುಮಾರ್ ಶ್ರೀವಾಸ್ತವ ಶನಿವಾರ ತಿಳಿಸಿದ್ದಾರೆ.
ಇವರಲ್ಲದೆ, ಇತರ ನಾಲ್ವರು ಕೈದಿಗಳು ಸಹ ಶಂಕಿತರಾಗಿದ್ದು, ಅವರನ್ನು ತನಿಖೆ ಮಾಡಲಾಗುತ್ತಿದೆ. ಜಿಲ್ಲಾ ಕಾರಾಗೃಹದಲ್ಲಿರುವ ಒಂಬತ್ತು ಕೈದಿಗಳು ಈಗಾಗಲೇ ಎಚ್‌ಐವಿ ಸೋಂಕಿತರಾಗಿದ್ದಾರೆ ಎಂದು ಅವರು ಹೇಳಿದರು. ಈ ಮೂಲಕ, ಒಟ್ಟು ಎಚ್‌ಐವಿ ಸೋಂಕಿತ ಕೈದಿಗಳ ಸಂಖ್ಯೆ 14ಕ್ಕೆ ತಲುಪಿದೆ. ಜಿಲ್ಲಾ ಕಾರಾಗೃಹವು ಎಚ್‌ಐವಿ ಸೋಂಕಿತ ಕೈದಿಗಳಿಗೆ ವಿಶೇಷ ಆಹಾರ ಮತ್ತು ನಿಯಮಿತ ಔಷಧಿಗಳನ್ನು ಒದಗಿಸುತ್ತದೆ ಎಂದು ಅವರು ಹೇಳಿದರು. ಬಲ್ಲಿಯಾದಲ್ಲಿನ ದಾದ್ರಿ ಮೇಳದಲ್ಲಿ ಕೆಲವು ಸೋಂಕಿತ ಕೈದಿಗಳು ತಮ್ಮ ಬೆನ್ನು ಮತ್ತು ಕೈಗಳ ಮೇಲೆ ಹಚ್ಚೆ ಹಾಕಿಸಿಕೊಂಡಿದ್ದರು ಎಂದು ಜಿಲ್ಲಾ ಜೈಲಿನ ಔಷಧಿಕಾರ ಶ್ರೀವಾಸ್ತವ ಹೇಳಿದ್ದಾರೆ. ಕೆಲವು ಕೈದಿಗಳು ಒಂದೇ ಸೂಜಿಯನ್ನು ಪದೇ ಪದೇ ಬಳಸುವುದರಿಂದ ಸೋಂಕಿಗೆ ಒಳಗಾಗಿದ್ದಾರೆ.
