ನವದೆಹಲಿ: ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಅವರೊಂದಿಗೆ ಯುದ್ಧವಲ್ಲ, ಶಾಂತಿಗಾಗಿ ಸಾರ್ವಜನಿಕವಾಗಿ ಕರೆ ನೀಡಿದ ಏಕೈಕ ಜಾಗತಿಕ ನಾಯಕ ಪ್ರಧಾನಿ ನರೇಂದ್ರ ಮೋದಿ ಎಂದು ಸ್ಪಷ್ಟಪಡಿಸಿರುವ ಭಾರತ, ಪ್ರಧಾನಿ ವಿರುದ್ಧ ಅಧ್ಯಕ್ಷ ವೊಲೊಡಿಮಿರ್ ಜೆಲೆನ್ಸ್ಕಿ ಅವರ ವಿರೋಧಿ ಹೇಳಿಕೆಗಳು ಆಧಾರರಹಿತವಾಗಿವೆ ಎಂದು ಉಕ್ರೇನ್ ಗೆ ತಿಳಿಸಿದೆ ಎಂದು ತಿಳಿದುಬಂದಿದೆ.
ಭಾರತದ ನಿಲುವನ್ನು ಸರಿಯಾದ ಮಾರ್ಗಗಳ ಮೂಲಕ ಉಕ್ರೇನ್ ಗೆ ತಿಳಿಸಲಾಗಿದೆ ಎಂದು ರಾಜತಾಂತ್ರಿಕ ಮೂಲಗಳು ತಿಳಿಸಿವೆ. ಯಾವುದೇ ದೇಶದೊಂದಿಗಿನ ಭಾರತದ ಸಂಬಂಧವು ಮೂರನೇ ರಾಷ್ಟ್ರವು ಯಾವುದಕ್ಕೆ ಆದ್ಯತೆ ನೀಡುತ್ತದೆ ಎಂಬುದರ ಮೇಲೆ ಆಧಾರಿತವಾಗಿಲ್ಲ ಎಂದು ಅವರು ಹೇಳಿದರು.
ಮೋದಿ ಅವರ ರಷ್ಯಾ ಭೇಟಿ ಮತ್ತು ಪುಟಿನ್ ಅವರೊಂದಿಗಿನ ಅಪ್ಪುಗೆಯನ್ನು ಟೀಕಿಸಿದ್ದ ಜೆಲೆನ್ಸ್ಕಿ, “ವಿಶ್ವದ ಅತಿದೊಡ್ಡ ಪ್ರಜಾಪ್ರಭುತ್ವದ ನಾಯಕ ಮಾಸ್ಕೋದಲ್ಲಿ ವಿಶ್ವದ ಅತ್ಯಂತ ರಕ್ತಸಿಕ್ತ ಅಪರಾಧಿಯನ್ನು ಇಂತಹ ದಿನದಂದು ತಬ್ಬಿಕೊಳ್ಳುವುದನ್ನು ನೋಡುವುದು ಶಾಂತಿ ಪ್ರಯತ್ನಗಳಿಗೆ ಭಾರಿ ನಿರಾಶೆ ಮತ್ತು ವಿನಾಶಕಾರಿ ಹೊಡೆತವಾಗಿದೆ” ಎಂದು ಹೇಳಿದ್ದರು.
ರಷ್ಯಾದ ಕಡೆಯಿಂದ ಹಾರಿಸಲಾಗಿದೆ ಎಂದು ಹೇಳಲಾದ ಕ್ಷಿಪಣಿ ಮಕ್ಕಳ ಆಸ್ಪತ್ರೆಗೆ ಅಪ್ಪಳಿಸಿದ ಘಟನೆಯನ್ನು ಅವರು ಉಲ್ಲೇಖಿಸುತ್ತಿದ್ದರು.
ಜೆಲೆನ್ಸ್ಕಿ ಅವರ ಟ್ವೀಟ್ ಸಮಯೋಚಿತವಲ್ಲ ಮತ್ತು ಅಪೂರ್ಣ ಮಾಹಿತಿಯನ್ನು ಆಧರಿಸಿದೆ ಎಂದು ಉಕ್ರೇನ್ ಅಧಿಕಾರಿಗಳಿಗೆ ಸ್ಪಷ್ಟಪಡಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ. ಪುಟಿನ್ ಅವರೊಂದಿಗೆ ಯುದ್ಧವಲ್ಲ, ಶಾಂತಿಯ ಅಗತ್ಯಕ್ಕಾಗಿ ಮಾತನಾಡಿದ ಏಕೈಕ ವಿಶ್ವ ನಾಯಕ ಮೋದಿ ಎಂದು ಅವರು ಹೇಳಿದರು.
“ಅದು ಯುದ್ಧ, ಸಂಘರ್ಷ ಅಥವಾ ಭಯೋತ್ಪಾದಕ ದಾಳಿಯಾಗಿರಲಿ, ಮಾನವೀಯತೆಯಲ್ಲಿ ನಂಬಿಕೆ ಹೊಂದಿರುವ ಯಾವುದೇ ವ್ಯಕ್ತಿಯು ಪ್ರಾಣಹಾನಿ ಸಂಭವಿಸಿದಾಗ ನೋವು ಅನುಭವಿಸುತ್ತಾನೆ” ಎಂದು ಮೋದಿ ದೂರದರ್ಶನ ಸಂವಾದದಲ್ಲಿ ಹೇಳಿದರು
