ನವದೆಹಲಿ:ದಿವ್ಯಾ ಪಹುಜಾ ಹತ್ಯೆ ಪ್ರಕರಣದ ಆರೋಪಿ ರವಿ ಬಂಗಾನನ್ನು ಗುಡಗಾಂವ್ ಪೊಲೀಸರು ಶುಕ್ರವಾರ ರಾಜಸ್ಥಾನದ ಜೈಪುರದಿಂದ ಬಂಧಿಸಿದ್ದಾರೆ. ಅವನನ್ನು ಹಿಡಿದು ಕೊಟ್ಟವರಿಗೆ 50,000 ರೂಪಾಯಿ ಬಹುಮಾನವನ್ನು ಘೋಷಿಸಿದ್ದರು. ಬಂಗಾ, ಮಾಜಿ ಮಾಡೆಲ್ ಶವವನ್ನು ವಿಲೇವಾರಿ ಮಾಡಿದ್ದಾನೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
2016 ರಲ್ಲಿ ಮುಂಬೈ ಹೋಟೆಲ್ ಕೊಠಡಿಯಲ್ಲಿ ಹರಿಯಾಣ ಮೂಲದ ದರೋಡೆಕೋರನ ನಕಲಿ ಎನ್‌ಕೌಂಟರ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಜಾಮೀನಿನ ಮೇಲೆ ಬಿಡುಗಡೆಯಾದ ಐದು ತಿಂಗಳ ನಂತರ 27 ವರ್ಷದ ಪಹುಜಾ ಜನವರಿ 2 ರಂದು ಹೋಟೆಲ್ ಸಿಟಿ ಪಾಯಿಂಟ್‌ನಲ್ಲಿ ಕೊಲೆಯಾದಳು.
ಬಲದೇವ್ ನಗರದ ನಿವಾಸಿಯಾಗಿರುವ ಪಹುಜಾಳನ್ನು ಅಭಿಜೀತ್ ಸಿಂಗ್ ಕೊಲೆ ಮಾಡಿದ್ದಾನೆ ಮತ್ತು ಆಕೆಯ ಶವವನ್ನು ಬಂಗಾ ಮತ್ತು ಬಾಲರಾಜ್ ಗಿಲ್ ಅವರು ಪಟಿಯಾಲಾದಲ್ಲಿ ವಿಲೇವಾರಿ ಮಾಡಿದ್ದಾರೆ. ಪಹುಜಾ ಶವವನ್ನು ತೆಗೆದುಕೊಂಡು ಹೋಗಿದ್ದ ಬಿಎಂಡಬ್ಲ್ಯು ಕಾರಿನ ಕೀ ಬಂಗಾ ಬಳಿಯಿದ್ದು, ಅದು ಇನ್ನೂ ಪತ್ತೆಯಾಗಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ. ಪೊಲೀಸರು ಗಿಲ್‌ನನ್ನು ಬಂಧಿಸಿದಾಗ ಬಂಗಾ ಈ ಹಿಂದೆ ಪಶ್ಚಿಮ ಬಂಗಾಳದ ಹೌರಾದಲ್ಲಿ ಪತ್ತೆಯಾಗಿದ್ದರು.
ಹಿಸಾರ್‌ನ ಮಾಡೆಲ್ ಟೌನ್ ನಿವಾಸಿ ಬಂಗಾ ಅವರನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು, ಹೆಚ್ಚಿನ ವಿಚಾರಣೆಗಾಗಿ ಮೂರು ದಿನಗಳ ಪೊಲೀಸ್ ಕಸ್ಟಡಿಗೆ ಕಳುಹಿಸಲಾಗಿದೆ.
ಹತ್ಯೆ ಪ್ರಕರಣದಲ್ಲಿ ಇದುವರೆಗೆ ಸಿಂಗ್, ಗಿಲ್ ಮತ್ತು ಬಂಗಾ ಸೇರಿದಂತೆ ಏಳು ಮಂದಿಯನ್ನು ಬಂಧಿಸಲಾಗಿದೆ.
ಓಲ್ಡ್ ಗುರಗಾಂವ್ ರಸ್ತೆಯಲ್ಲಿ ಆಯುಧವನ್ನು ವಶಪಡಿಸಿಕೊಳ್ಳಲಾಗಿದ್ದು, ಪಹುಜಾ ಅವರ ಫೋನ್ ಮತ್ತು ವೈಯಕ್ತಿಕ ವಸ್ತುಗಳು ಇನ್ನೂ ಪತ್ತೆಯಾಗಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.
