ನವದೆಹಲಿ : ಲೋಕಸಭಾ ಚುನಾವಣೆ 2024 ರ ನಾಲ್ಕನೇ ಹಂತ ಸೋಮವಾರ ಕೊನೆಗೊಂಡಿದೆ. ಈ ಹಂತದಲ್ಲಿ 10 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ 96 ಸ್ಥಾನಗಳಿಗೆ ಮತದಾನ ನಡೆದಿದೆ. ನಾಲ್ಕನೇ ಹಂತದ ಮತದಾನದಲ್ಲಿ, ಹೆಚ್ಚು ಜನರು ಮತ ಚಲಾಯಿಸಿದ್ದಾರೆ.
ಚುನಾವಣಾ ಆಯೋಗವು ತಡರಾತ್ರಿ ಹಂಚಿಕೊಂಡ ಚುನಾವಣಾ ಮಾಹಿತಿಯ ಪ್ರಕಾರ, ದೇಶದ ನಾಲ್ಕನೇ ಹಂತದ ಲೋಕಸಭಾ ಸ್ಥಾನಗಳಲ್ಲಿ ಒಟ್ಟು 67.25 ರಷ್ಟು ಮತದಾನ ದಾಖಲಾಗಿದೆ. ಪಶ್ಚಿಮ ಬಂಗಾಳದಲ್ಲಿ ಅತಿ ಹೆಚ್ಚು ಮತದಾನವಾಗಿದೆ. ಚುನಾವಣಾ ಆಯೋಗವು ಕೆಲವೇ ದಿನಗಳಲ್ಲಿ ಹೊಸ ಅಂಕಿಅಂಶಗಳನ್ನು ಬಿಡುಗಡೆ ಮಾಡಲಿದ್ದು, ಇದರಲ್ಲಿ ಮತದಾನದ ಶೇಕಡಾವಾರು ಸ್ವಲ್ಪ ಹೆಚ್ಚಾಗಬಹುದು.
2019ರ ಚುನಾವಣೆಗಿಂತ ಹೆಚ್ಚು ಮತದಾನ
ಲೋಕಸಭಾ ಚುನಾವಣೆ 2024 ರ ನಾಲ್ಕನೇ ಹಂತದಲ್ಲಿ ಶೇಕಡಾ 67.25 ರಷ್ಟು ಮತದಾನವಾಗಿದೆ, ಇದು 2019 ರ ಚುನಾವಣೆಯಲ್ಲಿ ಈ ಹಂತಕ್ಕಿಂತ ಶೇಕಡಾ 1.74 ರಷ್ಟು ಹೆಚ್ಚಾಗಿದೆ. ಲೋಕಸಭಾ ಚುನಾವಣೆಯ ನಾಲ್ಕನೇ ಹಂತದ ನಂತರ, 23 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ 379 ಸ್ಥಾನಗಳಿಗೆ ಮತದಾನ ಪೂರ್ಣಗೊಂಡಿದೆ. ಆಂಧ್ರಪ್ರದೇಶ, ಸಿಕ್ಕಿಂ ಮತ್ತು ಅರುಣಾಚಲ ಪ್ರದೇಶದ ವಿಧಾನಸಭಾ ಚುನಾವಣೆಗೂ ಮತದಾನ ಪೂರ್ಣಗೊಂಡಿದೆ.
ಯಾವ ರಾಜ್ಯದಲ್ಲಿ ಎಷ್ಟು ಮತಗಳು?
ತೆಲಂಗಾಣದ 17, ಆಂಧ್ರಪ್ರದೇಶದ 25, ಉತ್ತರ ಪ್ರದೇಶದ 13, ಬಿಹಾರದ 5, ಜಾರ್ಖಂಡ್ ನ 4, ಮಧ್ಯಪ್ರದೇಶದ 8, ಮಹಾರಾಷ್ಟ್ರದ 11, ಒಡಿಶಾದ 4, ಪಶ್ಚಿಮ ಬಂಗಾಳದ 8 ಮತ್ತು ಜಮ್ಮು ಮತ್ತು ಕಾಶ್ಮೀರದ 1 ಕ್ಷೇತ್ರಗಳಿಗೆ ಇಂದು ಮತದಾನ ನಡೆಯಲಿದೆ. ಪಶ್ಚಿಮ ಬಂಗಾಳದಲ್ಲಿ ಶೇ.78.44ರಷ್ಟು ಮತದಾನವಾಗಿದೆ. ಆಂಧ್ರಪ್ರದೇಶದಲ್ಲಿ ಶೇ.78.25 ಮತ್ತು ಒಡಿಶಾದಲ್ಲಿ ಶೇ.73.97ರಷ್ಟು ಮತದಾನವಾಗಿದೆ. ಮಧ್ಯಪ್ರದೇಶದಲ್ಲಿ ಶೇ.71.72, ಬಿಹಾರದಲ್ಲಿ ಶೇ.57.06, ಜಾರ್ಖಂಡ್ ನಲ್ಲಿ ಶೇ.65.31, ಮಹಾರಾಷ್ಟ್ರದಲ್ಲಿ ಶೇ.59.64, ತೆಲಂಗಾಣದಲ್ಲಿ ಶೇ.64.87 ಮತ್ತು ಉತ್ತರ ಪ್ರದೇಶದಲ್ಲಿ ಶೇ.58.05ರಷ್ಟು ಮತದಾನವಾಗಿದೆ. ಜಮ್ಮು ಮತ್ತು ಕಾಶ್ಮೀರದ ಶ್ರೀನಗರ ಕ್ಷೇತ್ರದಲ್ಲಿ ಶೇ.37.98ರಷ್ಟು ಮತದಾನವಾಗಿದೆ.
