ಬೆಂಗಳೂರು: ರಾಜ್ಯದ ಕೈಗಾರಿಕಾ ಕ್ಷೇತ್ರದಲ್ಲಿ ಹೊಸ ಸಂಚಲನ ಮೂಡಿಸುವ ನಿಟ್ಟಿನಲ್ಲಿ, ಒಟ್ಟು 13 ಜಿಲ್ಲೆಗಳಲ್ಲಿ 37 ಹೊಸ ಕೈಗಾರಿಕಾ ಯೋಜನೆಗಳ ಸ್ಥಾಪನೆಗೆ ರಾಜ್ಯ ಮಟ್ಟದ ಏಕಗವಾಕ್ಷಿ ಅನುಮೋದನಾ ಸಮಿತಿಯು ಹಸಿರು ನಿಶಾನೆ ತೋರಿಸಿದೆ.
ಶುಕ್ರವಾರ ಕೈಗಾರಿಕಾ ಸಚಿವ ಎಂ.ಬಿ. ಪಾಟೀಲ್ ಅವರ ನೇತೃತ್ವದಲ್ಲಿ ನಡೆದ 158ನೇ ಸಮಿತಿ ಸಭೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದ್ದು, ಇದರಿಂದ ರಾಜ್ಯಕ್ಕೆ ದೊಡ್ಡ ಮಟ್ಟದ ಬಂಡವಾಳ ಹರಿದುಬರಲಿದೆ.ಒಟ್ಟು ₹4,824.31 ಕೋಟಿ ಹೂಡಿಕೆಯ ಯೋಜನೆಗಳಿಗೆ ಅನುಮೋದನೆ ನೀಡಲಾಗಿದೆ. ಈ ಯೋಜನೆಗಳ ಮೂಲಕ ಸುಮಾರು 14,525 ಜನರಿಗೆ ನೇರ ಉದ್ಯೋಗ ದೊರೆಯಲಿದೆ.ವಿಜಯಪುರ, ಚಿತ್ರದುರ್ಗ, ಕೋಲಾರ, ರಾಮನಗರ ಸೇರಿದಂತೆ ಒಟ್ಟು 13 ಜಿಲ್ಲೆಗಳಲ್ಲಿ ಈ ಕೈಗಾರಿಕೆಗಳು ತಲೆಎತ್ತಲಿವೆ.
ಐಟಿ ಮೂಲಸೌಕರ್ಯ, ಸಕ್ಕರೆ ಕಾರ್ಖಾನೆ, ತಾಂತ್ರಿಕ ಜವಳಿ (Technical Textile), ಸಂಕುಚಿತ ಅನಿಲ (Compressed Gas), ವೈಮಾನಿಕ ಕ್ಷೇತ್ರ, ಆಭರಣ ತಯಾರಿಕೆ, ಎಲೆಕ್ಟ್ರಾನಿಕ್ಸ್ ಮತ್ತು ಸಾಫ್ಟ್ವೇರ್ ಕ್ಷೇತ್ರಗಳ ಯೋಜನೆಗಳು ಇದರಲ್ಲಿ ಸೇರಿವೆ.
ಪ್ರಮುಖ ಹೂಡಿಕೆದಾರರು:
ಸಭೆಯಲ್ಲಿ ಅನುಮೋದನೆ ಪಡೆದ ಕೆಲವು ಪ್ರಮುಖ ಸಂಸ್ಥೆಗಳು ಮತ್ತು ಅವುಗಳ ಹೂಡಿಕೆ ವಿವರ ಹೀಗಿದೆ:
ಬಾಗ್ಮನೆ ಕನ್ಸ್ಸ್ಟ್ರಕ್ಷನ್: ಐಟಿ ಮೂಲಸೌಕರ್ಯ ಅಭಿವೃದ್ಧಿಗೆ ₹494.65 ಕೋಟಿ.
ಕರ್ನಾಟಕ ಬಂಗಾರು ಶುಗರ್ಸ್: ₹443.50 ಕೋಟಿ.
ಕ್ಲೀನ್ ಪಾರ್ಕ್: ₹376 ಕೋಟಿ.
ತ್ರಿಶೂಲ್ ಬಿಲ್ಡ್ಟೆಕ್ ಆಂಡ್ ಇನ್ಫ್ರಾಸ್ಟ್ರಕ್ಚರ್: ₹300 ಕೋಟಿ.
