ಒಂದು ಕಾಲದಲ್ಲಿ ಕೋಡಿಂಗ್ ಅತ್ಯುತ್ತಮ ವೃತ್ತಿ ಆಯ್ಕೆಯಾಗಿತ್ತು. ಆದರೆ, ಆಂಥ್ರೊಪಿಕ್ನ ‘ಕ್ಲೌಡ್ ಕೋಡ್’ (Claude Code) ಮತ್ತು ಓಪನ್ ಎಐನ ‘ಕೋಡೆಕ್ಸ್’ (Codex) ನಂತಹ ಎಐ (AI) ಪರಿಕರಗಳು ಬಂದ ನಂತರ ಪರಿಸ್ಥಿತಿ ಬದಲಾಗಿದೆ. ಇವು ಕೇವಲ ಕೋಡ್ನ ಮುಂದಿನ ಸಾಲನ್ನು ಸೂಚಿಸುವುದಿಲ್ಲ, ಬದಲಾಗಿ ಸ್ವಾಯತ್ತ ಟರ್ಮಿನಲ್ ಸಹಾಯಕಗಳಾಗಿ ಇಡೀ ಸಾಫ್ಟ್ವೇರ್ ರಚನೆಯನ್ನು ರೂಪಿಸುತ್ತವೆ, ಪರೀಕ್ಷೆಗಳನ್ನು ನಡೆಸುತ್ತವೆ ಮತ್ತು ತಾವಾಗಿಯೇ ದೋಷಗಳನ್ನು ಸರಿಪಡಿಸುತ್ತವೆ. ಈ ಪರಿಕರಗಳ ಆಗಮನದ ನಂತರ ಸಾಫ್ಟ್ವೇರ್ ಉದ್ಯೋಗದ ಸ್ವರೂಪವೇ ಬದಲಾಗಿದೆ ಎಂಬುದು ಎಲ್ಲರಿಗೂ ತಿಳಿದಿರುವ ವಿಷಯ. ಆದರೆ ಈಗ, ಟೆಸ್ಲಾ ಮತ್ತು xAI ಸಂಸ್ಥಾಪಕ ಎಲಾನ್ ಮಸ್ಕ್, ಈ ವರ್ಷದ ಅಂತ್ಯದ ವೇಳೆಗೆ ಸಾಂಪ್ರದಾಯಿಕ ಕೋಡಿಂಗ್ ಎಂಬ ವೃತ್ತಿಯೇ ಕಣ್ಮರೆಯಾಗಬಹುದು ಎಂದು ಹೇಳಿದ್ದಾರೆ.
ಒಂದು ಸಮ್ಮೇಳನದಲ್ಲಿ ಮಾತನಾಡಿದ ಮಸ್ಕ್, “ಈ ವರ್ಷದ ಅಂತ್ಯದ ವೇಳೆಗೆ ಜನರು ಕೋಡಿಂಗ್ ಮಾಡುವ ಅಗತ್ಯವೇ ಇರುವುದಿಲ್ಲ ಎಂದು ನಾನು ಭಾವಿಸುತ್ತೇನೆ. ಎಐ ನೇರವಾಗಿ ಬೈನರಿ ಕೋಡ್ ಅನ್ನು ಸೃಷ್ಟಿಸುತ್ತದೆ. ಯಾವುದೇ ಕಂಪೈಲರ್ (ಒಂದು ಪ್ರೋಗ್ರಾಮಿಂಗ್ ಭಾಷೆಯಿಂದ ಮತ್ತೊಂದಕ್ಕೆ ಪರಿವರ್ತಿಸುವ ಪ್ರೋಗ್ರಾಂ) ಮಾಡುವುದಕ್ಕಿಂತ ಹೆಚ್ಚು ಪರಿಣಾಮಕಾರಿಯಾಗಿ ಎಐ ಬೈನರಿಯನ್ನು ರಚಿಸಬಲ್ಲದು. ಆದ್ದರಿಂದ, ‘ಈ ನಿರ್ದಿಷ್ಟ ಫಲಿತಾಂಶಕ್ಕಾಗಿ ಆಪ್ಟಿಮೈಸ್ ಮಾಡಿದ ಬೈನರಿಯನ್ನು ರಚಿಸು’ ಎಂದು ಹೇಳಿದರೆ ಸಾಕು, ಪಾರಂಪರಿಕ ಕೋಡಿಂಗ್ ಮಾಡುವ ಅಗತ್ಯವೇ ಇರುವುದಿಲ್ಲ. ಈ ಹಂತವನ್ನು ನಾವು ಬಹುಶಃ ಈ ವರ್ಷದ ಅಂತ್ಯದ ವೇಳೆಗೆ ದಾಟುತ್ತೇವೆ,” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಕಂಪನಿಗಳು ಈ ಹೊಸ ಪರಿಕರಗಳ ಮೇಲೆ ಹೆಚ್ಚು ಅವಲಂಬಿತವಾಗಿರುವುದರಿಂದ, ಹೊಸಬರಿಗೆ ನೀಡಲಾಗುವ (Entry-level) ಕೋಡಿಂಗ್ ಉದ್ಯೋಗಗಳು ಈಗಾಗಲೇ ಕಡಿಮೆಯಾಗಿವೆ. ರೆವೆಲಿಯೊ ಲ್ಯಾಬ್ಸ್ (Revelio Labs) ಮತ್ತು ವರ್ಲ್ಡ್ ಎಕನಾಮಿಕ್ ಫೋರಮ್ ಕಳೆದ ತಿಂಗಳು ಪ್ರಕಟಿಸಿದ ವರದಿಯ ಪ್ರಕಾರ, ಹೊಸಬರ ಉದ್ಯೋಗ ನೇಮಕಾತಿಯಲ್ಲಿ ಶೇಕಡಾ 35ರಷ್ಟು ಕುಸಿತ ಕಂಡುಬಂದಿದೆ. ಇದರಲ್ಲಿ ಸಾಫ್ಟ್ವೇರ್ ಅಭಿವೃದ್ಧಿ ಮತ್ತು ಪ್ರೋಗ್ರಾಮಿಂಗ್ ಉದ್ಯೋಗಗಳು ಅತಿ ಹೆಚ್ಚು ಬಾಧಿತವಾಗಿವೆ.
ಕಳೆದ ವರ್ಷ, ಆಂಥ್ರೊಪಿಕ್ನ ಸಹ-ಸಂಸ್ಥಾಪಕ ಮತ್ತು ಸಿಇಒ ಡಾರಿಯೊ ಅಮೊಡೀ ಅವರು, ಎಐ ಎಲ್ಲಾ ಹೊಸಬರ ಉದ್ಯೋಗಗಳಲ್ಲಿ (White-collar jobs) ಅರ್ಧದಷ್ಟನ್ನು ನಿರ್ಮೂಲನೆ ಮಾಡಬಹುದು ಮತ್ತು ನಿರುದ್ಯೋಗವನ್ನು ಶೇ. 10 ರಿಂದ 20ಕ್ಕೆ ಏರಿಸಬಹುದು ಎಂದು ಎಚ್ಚರಿಸಿದ್ದರು.
ಎಐನ ಸಾಮಾಜಿಕ ಪ್ರಭಾವದ ಬಗ್ಗೆ ಆಗಾಗ್ಗೆ ಮಾತನಾಡುವ ಅಮೊಡೀ, ಎಐ ಅಭಿವೃದ್ಧಿಯನ್ನು ನಿಲ್ಲಿಸುವ ಅಥವಾ ನಿಧಾನಗೊಳಿಸುವ ಅಗತ್ಯವಿದೆ ಎಂದು ಕರೆ ನೀಡಿದ್ದರು. “ಉದ್ಯೋಗದ ವಿಷಯದಲ್ಲಿ ನನಗೆ ಸಾಕಷ್ಟು ಆತಂಕವಿದೆ” ಎಂದು ಕಳೆದ ವರ್ಷ ಅವರು ಹೇಳಿದ್ದರು. ಆದಾಗ್ಯೂ, ಆಂಥ್ರೊಪಿಕ್ ಈಗ ಷೇರು ಮಾರುಕಟ್ಟೆಯಲ್ಲಿ ಪಟ್ಟಿ ಮಾಡಲು (IPO) ಸಿದ್ಧತೆ ನಡೆಸುತ್ತಿದ್ದು, ಅಮೊಡೀ ಅವರು ಎಐ-ಸಂಬಂಧಿತ ಉದ್ಯೋಗ ಕಡಿತದ ಬಗ್ಗೆ ತಮ್ಮ ನಿಲುವನ್ನು ಬದಲಾಯಿಸಿಕೊಂಡಿದ್ದಾರೆ. ಎಐ ವಾಸ್ತವವಾಗಿ ಜನರು ಮಾಡುವ ಕೆಲಸದ ವ್ಯಾಪ್ತಿಯನ್ನು ವಿಸ್ತರಿಸಬಹುದು ಎಂದು ಅವರು ಇತ್ತೀಚೆಗೆ ಹೇಳಿದ್ದಾರೆ.
