ನವದೆಹಲಿ: ನರೇಂದ್ರ ಮೋದಿ ಅವರು ಮುಸ್ಲಿಂ ಸಮುದಾಯದ ವಿರುದ್ಧ ದ್ವೇಷದ ಅಭಿಯಾನವನ್ನು ನಡೆಸುತ್ತಿದ್ದಾರೆ ಎಂದು ಆರೋಪಿಸಿದ ಎಐಎಂಐಎಂ ಮುಖ್ಯಸ್ಥ ಅಸಾದುದ್ದಿನ್ ಒವೈಸಿ, “ನಾಳೆ ದೇಶದಲ್ಲಿ ಗಲಭೆ ಭುಗಿಲೆದ್ದರೆ ಅದಕ್ಕೆ ಪ್ರಧಾನಿ ಸಂಪೂರ್ಣ ಜವಾಬ್ದಾರರಾಗಿರುತ್ತಾರೆ” ಎಂದು ಹೇಳಿದರು.
ಪ್ರಧಾನಿಯವರ ‘ಮೋದಿ ಕಿ ಗ್ಯಾರಂಟಿ’ ಹೇಳಿಕೆಯನ್ನು ಟೀಕಿಸಿದ ಓವೈಸಿ, ಇದು ಮುಸ್ಲಿಮರ ದ್ವೇಷದ ಖಾತರಿಯಲ್ಲದೆ ಬೇರೇನೂ ಅಲ್ಲ ಎಂದು ಹೇಳಿದರು.
“ಮೋದಿಯವರ ಏಕೈಕ ಗ್ಯಾರಂಟಿ, ಮುಸ್ಲಿಮರ ದ್ವೇಷದ ಖಾತರಿ.ಅವರು 2002 ರಿಂದ ಇದನ್ನು ಮಾಡುತ್ತಿದ್ದಾರೆ” ಎಂದು ಓವೈಸಿ ಸುದ್ದಿ ಸಂಸ್ಥೆ ಎಎನ್ಐಗೆ ತಿಳಿಸಿದರು.
ದೇಶದಲ್ಲಿ 17 ಕೋಟಿ ಮುಸ್ಲಿಮರಿದ್ದು, ಇದು ಭಾರತದ ಅತಿದೊಡ್ಡ ಅಲ್ಪಸಂಖ್ಯಾತ ಸಮುದಾಯವಾಗಿದೆ ಎಂದು ಎಐಎಂಐಎಂ ಮುಖ್ಯಸ್ಥರು ಹೇಳಿದರು.
ಅವರು ದೇಶದ 140 ಕೋಟಿ ಜನರ ಪ್ರಧಾನಿ.ಮುಸ್ಲಿಮರನ್ನ ಈ ರೀತಿ ನೋಯಿಸುವುದು, ಅವರನ್ನು ಈ ರೀತಿ ದ್ವೇಷಿಸುವುದು! ನಾಳೆ ದೇಶದಲ್ಲಿ ಗಲಭೆ ಸಂಭವಿಸಿದರೆ ಅದಕ್ಕೆ ನರೇಂದ್ರ ಮೋದಿ ಅವರೇ ಹೊಣೆ” ಎಂದು ಓವೈಸಿ ಹೇಳಿದ್ದಾರೆ.
ಕಾಂಗ್ರೆಸ್ ಅಧಿಕಾರಕ್ಕೆ ಬಂದರೆ ದೇಶದ ಸಂಪತ್ತನ್ನು ಹೆಚ್ಚು ಮಕ್ಕಳನ್ನು ಹೊಂದಿರುವವರಿಗೆ ವಿತರಿಸುತ್ತದೆ ಎಂದು ಪ್ರಧಾನಿ ಮೋದಿ ಆರೋಪಿಸಿದ ಕೆಲವು ದಿನಗಳ ನಂತರ ಅಸಾದುದ್ದಿನ್ ಒವೈಸಿ ಈ ಹೇಳಿಕೆ ನೀಡಿದ್ದಾರೆ.
