ಪರಮಾಣು ಶಸ್ತ್ರಾಸ್ತ್ರ ನೀತಿಯಲ್ಲಿ ಮಹತ್ವದ ಬದಲಾವಣೆಯ ಭಾಗವಾಗಿ, ಭಾರತವು ಮೊದಲ ಬಾರಿಗೆ 12 ಪರಮಾಣು ಸಿಡಿತಲೆಗಳನ್ನು (Nuclear warheads) “ನಿಯೋಜಿಸಿದೆ” (deployed). ಸ್ಟಾಕ್ಹೋಮ್ ಇಂಟರ್ನ್ಯಾಷನಲ್ ಪೀಸ್ ರಿಸರ್ಚ್ ಇನ್ಸ್ಟಿಟ್ಯೂಟ್ (SIPRI) ನ ಇತ್ತೀಚಿನ ವರದಿಯಲ್ಲಿ ಈ ವಿಷಯ ಬಹಿರಂಗವಾಗಿದೆ.
ಜಾಗತಿಕ ಶಸ್ತ್ರಾಸ್ತ್ರಗಳ ಮೇಲ್ವಿಚಾರಣಾ ಸಂಸ್ಥೆಯಾದ ಎಸ್ಐಪಿಆರ್ಐ, ತನ್ನ ಇತ್ತೀಚಿನ ವರದಿಯಲ್ಲಿ ದಶಕಗಳಿಂದ ಭಾರತ ಪಾಲಿಸುತ್ತಿದ್ದ ನೀತಿಯಲ್ಲಿನ ದೊಡ್ಡ ಬದಲಾವಣೆಯನ್ನು ಎತ್ತಿ ತೋರಿಸಿದೆ. ಇಷ್ಟು ದಿನ ಪರಮಾಣು ಸಿಡಿತಲೆಗಳು ಮತ್ತು ಅವುಗಳನ್ನು ಉಡಾಯಿಸುವ ವ್ಯವಸ್ಥೆಗಳನ್ನು ಪ್ರತ್ಯೇಕವಾಗಿ ಸಂಗ್ರಹಿಸಿಡಲಾಗುತ್ತಿತ್ತು. ಆದರೆ ಈಗ, ಭಾರತದ ಪರಮಾಣು ಶಸ್ತ್ರಾಸ್ತ್ರಗಳನ್ನು ದಾಸ್ತಾನು (stockpiled) ಮಾಡುವ ಬದಲು, ಕಾರ್ಯಾಚರಣೆಗೆ ಸನ್ನದ್ಧವಾಗಿ ನಿಯೋಜಿಸಲಾಗಿದೆ (operationally deployed) ಎಂದು ವರದಿ ಹೇಳಿದೆ.
ನೆಲದೊಳಗಿನ ಕ್ಷಿಪಣಿ ಸೈಲೋಗಳು ಮತ್ತು ಹೊಸ ಪರಮಾಣು ಜಲಾಂತರ್ಗಾಮಿ ನೌಕೆಗಳಲ್ಲಿ ಉಡಾವಣೆಗೆ ಸಿದ್ಧವಿರುವ ಪರಮಾಣು ಶಸ್ತ್ರಾಸ್ತ್ರಗಳನ್ನು ನಿಯೋಜಿಸಿರುವುದು ಭಾರತದ ಹೆಚ್ಚಿನ ಸನ್ನದ್ಧತೆಯನ್ನು ಸೂಚಿಸುತ್ತದೆ. ಭಾರತವು ಪರಮಾಣು ಸಿಡಿತಲೆಗಳನ್ನು ಕ್ಷಿಪಣಿ ವ್ಯವಸ್ಥೆಗಳೊಂದಿಗೆ ಜೋಡಿಸಿರುವುದು ಅಥವಾ ಅವುಗಳನ್ನು ಕಾರ್ಯಾಚರಣಾ ಪಡೆಗಳ ನೆಲೆಗಳಲ್ಲಿ ಇರಿಸಿದ್ದು ಇದೇ ಮೊದಲ ಬಾರಿಯಾಗಿದೆ ಎಂದು ವರದಿ ಉಲ್ಲೇಖಿಸಿದೆ.
ಎಸ್ಐಪಿಆರ್ಐ ವರದಿಯ ಪ್ರಕಾರ, ಕಳೆದ ಒಂದು ವರ್ಷದಲ್ಲಿ ಭಾರತದ ಪರಮಾಣು ಶಸ್ತ್ರಾಸ್ತ್ರಗಳ ದಾಸ್ತಾನು ಅಲ್ಪ ಪ್ರಮಾಣದಲ್ಲಿ ಹೆಚ್ಚಾಗಿದೆ. ಭಾರತವು ಬ್ಯಾಲಿಸ್ಟಿಕ್ ಕ್ಷಿಪಣಿ ಜಲಾಂತರ್ಗಾಮಿ ನೌಕೆಗಳಲ್ಲಿ (SSBN) ಕೆಲವು ಸಿಡಿತಲೆಗಳನ್ನು ನಿಯೋಜಿಸಿ, ಪ್ರತಿಬಂಧಕ ಗಸ್ತು (deterrence patrols) ನಡೆಸಿದೆ.
ಸೋಮವಾರ ಬಿಡುಗಡೆಯಾದ ಎಸ್ಐಪಿಆರ್ಐ ವರದಿಯಲ್ಲಿ, “ಜನವರಿ 2026 ರ ಹೊತ್ತಿಗೆ ಭಾರತವು ಸುಮಾರು 190 ಪರಮಾಣು ಶಸ್ತ್ರಾಸ್ತ್ರಗಳ ದಾಸ್ತಾನನ್ನು ಹೊಂದಿದೆ – ಇದು ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಅಲ್ಪ ಹೆಚ್ಚಳವಾಗಿದೆ. ಈ ಶಸ್ತ್ರಾಸ್ತ್ರಗಳನ್ನು ವಿಮಾನಗಳು, ಭೂ-ಆಧಾರಿತ ಕ್ಷಿಪಣಿಗಳು ಮತ್ತು ಜಲಾಂತರ್ಗಾಮಿ ನೌಕೆಗಳನ್ನು (SSBNs) ಒಳಗೊಂಡ ಪರಮಾಣು ತ್ರಿಕೋನ (Nuclear triad) ವ್ಯವಸ್ಥೆಗೆ ನಿಯೋಜಿಸಲಾಗಿದೆ” ಎಂದು ತಿಳಿಸಲಾಗಿದೆ.
”ಶಾಂತಿಕಾಲದಲ್ಲಿ ಭಾರತವು ತನ್ನ ಪರಮಾಣು ಸಿಡಿತಲೆಗಳನ್ನು ಉಡಾವಣಾ ವಾಹಕಗಳಿಂದ ಪ್ರತ್ಯೇಕವಾಗಿ ಸಂಗ್ರಹಿಸುತ್ತದೆ ಎಂದು ದೀರ್ಘಕಾಲದಿಂದ ಭಾವಿಸಲಾಗಿತ್ತು. ಆದಾಗ್ಯೂ, ಭಾರತವು ಕ್ಷಿಪಣಿಗಳನ್ನು ಕ್ಯಾನಿಸ್ಟರ್ಗಳಲ್ಲಿ ಇರಿಸುವ ಮತ್ತು ಸಮುದ್ರ-ಆಧಾರಿತ ಗಸ್ತು ನಡೆಸುವತ್ತ ಇತ್ತೀಚೆಗೆ ತೆಗೆದುಕೊಂಡಿರುವ ಕ್ರಮಗಳು, ಶಾಂತಿಕಾಲದಲ್ಲೂ ಕೆಲವು ಸಿಡಿತಲೆಗಳನ್ನು ಅವುಗಳ ಉಡಾವಣಾ ವಾಹಕಗಳೊಂದಿಗೆ ಜೋಡಿಸುವ ದಿಕ್ಕಿನಲ್ಲಿ ಭಾರತ ಸಾಗುತ್ತಿರಬಹುದು ಎಂಬುದನ್ನು ಸೂಚಿಸುತ್ತವೆ” ಎಂದು ವರದಿ ಹೇಳಿದೆ.
ಭಾರತವು ಪರಮಾಣು ಶಸ್ತ್ರಾಸ್ತ್ರಗಳ ವಿಷಯದಲ್ಲಿ “ಮೊದಲು ಬಳಸುವುದಿಲ್ಲ” (No first use) ಎಂಬ ನೀತಿಯನ್ನು ಅನುಸರಿಸುತ್ತದೆ. ಪರಮಾಣು ದಾಳಿಯನ್ನು ಪ್ರಾರಂಭಿಸುವವರಾಗಬಾರದು ಎಂದು ಭಾರತ ಬದ್ಧವಾಗಿದೆ. ಭಾರತೀಯ ಭೂಪ್ರದೇಶ ಅಥವಾ ಭಾರತೀಯ ಪಡೆಗಳ ಮೇಲೆ ಎಲ್ಲಿಯಾದರೂ ಪರಮಾಣು ದಾಳಿ ನಡೆದರೆ, ಪ್ರತೀಕಾರವಾಗಿ ಮಾತ್ರ ಪರಮಾಣು ಶಸ್ತ್ರಾಸ್ತ್ರಗಳನ್ನು ಬಳಸಲಾಗುತ್ತದೆ. ಭಾರತವು ಸೀಮಿತ ಆದರೆ ಪರಿಣಾಮಕಾರಿ ಪರಮಾಣು ಶಸ್ತ್ರಾಸ್ತ್ರಗಳನ್ನು ಹೊಂದಿದೆ. ಈ ಸಾಮರ್ಥ್ಯವನ್ನು ಶಸ್ತ್ರಾಸ್ತ್ರ ಪೈಪೋಟಿಯಲ್ಲಿ ತೊಡಗಿಸಿಕೊಳ್ಳುವುದಕ್ಕಿಂತ ಹೆಚ್ಚಾಗಿ, ಸಂಭಾವ್ಯ ಆಕ್ರಮಣಕಾರರನ್ನು ತಡೆಯುವ (deter) ಉದ್ದೇಶದಿಂದಲೇ ರೂಪಿಸಲಾಗಿದೆ.
