ಲಾಸ್ ಏಂಜಲೀಸ್:ದಕ್ಷಿಣ ಕ್ಯಾಲಿಫೋರ್ನಿಯಾದ ಆರೆಂಜ್ ಕೌಂಟಿಯಲ್ಲಿರುವ ಗಗನನೌಕೆ ಬಿಡಿಭಾಗಗಳ ತಯಾರಿಕಾ ಕಾರ್ಖಾನೆಯೊಂದರಲ್ಲಿ (Aerospace Plant) ಭೀಕರ ರಾಸಾಯನಿಕ ಟ್ಯಾಂಕ್ ಸ್ಫೋಟಗೊಳ್ಳುವ ಭೀತಿ ಎದುರಾಗಿದೆ. ಈ ಹಿನ್ನೆಲೆಯಲ್ಲಿ ಮುನ್ನೆಚ್ಚರಿಕೆ ಕ್ರಮವಾಗಿ ಸುಮಾರು 40,000 ಕ್ಕೂ ಹೆಚ್ಚು ನಿವಾಸಿಗಳಿಗೆ ತಕ್ಷಣವೇ ಮನೆಗಳನ್ನು ಖಾಲಿ ಮಾಡಿ ಸುರಕ್ಷಿತ ಸ್ಥಳಗಳಿಗೆ ತೆರಳುವಂತೆ ತುರ್ತು ಸ್ಥಳಾಂತರದ (Evacuation Order) ಆದೇಶ ಹೊರಡಿಸಲಾಗಿದೆ.
ಗಾರ್ಡನ್ ಗ್ರೋವ್ ನಗರದಲ್ಲಿರುವ ‘ಜಿಕೆಎನ್ ಏರೋಸ್ಪೇಸ್’ (GKN Aerospace) ಸಂಸ್ಥೆಯ ಭಾರಿ ಕೈಗಾರಿಕಾ ಟ್ಯಾಂಕ್ನಲ್ಲಿ ಈ ತಾಂತ್ರಿಕ ದೋಷ ಕಾಣಿಸಿಕೊಂಡಿದೆ. ಕ್ಯಾಲಿಫೋರ್ನಿಯಾ ಗವರ್ನರ್ ರಾಜ್ಯದಲ್ಲಿ ತುರ್ತು ಪರಿಸ್ಥಿತಿಯನ್ನು ಘೋಷಿಸಿದ್ದಾರೆ.
ವರದಿಗಳ ಪ್ರಕಾರ, ಪ್ಲಾಸ್ಟಿಕ್ ಮತ್ತು ಗಗನನೌಕೆಗಳ ಬಿಡಿಭಾಗಗಳನ್ನು ತಯಾರಿಸಲು ಬಳಸಲಾಗುವ ಸುಮಾರು 7,000 ಗ್ಯಾಲನ್ (ಬೀಗ ಹತ್ತಿರ 26,500 ಲೀಟರ್) ಅತ್ಯಂತ ಅಪಾಯಕಾರಿ ಹಾಗೂ ಸುಲಭವಾಗಿ ಜ್ವಾಲೆ ಹೊತ್ತಿಕೊಳ್ಳುವ ‘ಮಿಥೈಲ್ ಮೆಥಾಕ್ರಿಲೇಟ್’ (Methyl Methacrylate) ಎಂಬ ಕೆಮಿಕಲ್ ಹೊಂದಿರುವ ಟ್ಯಾಂಕ್ನ ಕೂಲಿಂಗ್ ವ್ಯವಸ್ಥೆ ವಿಫಲವಾಗಿದೆ. ಇದರಿಂದಾಗಿ ಟ್ಯಾಂಕ್ ಅತಿಯಾಗಿ ಕಾಯುತ್ತಿದ್ದು (Overheat), ತಾಪಮಾನ ಗಂಟೆಯಿಂದ ಗಂಟೆಗೆ ಹೆಚ್ಚಾಗುತ್ತಿದೆ.
”ಈ ಟ್ಯಾಂಕ್ ಯಾವುದೇ ಕ್ಷಣದಲ್ಲಾದರೂ ಸೀಳಬಹುದು ಅಥವಾ ಭೀಕರವಾಗಿ ಸ್ಫೋಟಗೊಳ್ಳಬಹುದು. ಅದು ಯಾವಾಗ ಸಂಭವಿಸುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ. ನಾವು ಅದನ್ನು ತಡೆಯಲು ನಮ್ಮ ಸರ್ವಪ್ರಯತ್ನ ನಡೆಸುತ್ತಿದ್ದೇವೆ,” ಎಂದು ಆರೆಂಜ್ ಕೌಂಟಿ ಅಗ್ನಿಶಾಮಕ ದಳದ ಮುಖ್ಯಸ್ಥ ಕ್ರೇಗ್ ಕೋವಿ ಆತಂಕ ವ್ಯಕ್ತಪಡಿಸಿದ್ದಾರೆ.
ಮೊದಲು ಗಾರ್ಡನ್ ಗ್ರೋವ್ ನಗರದ ಜನರಿಗೆ ಮಾತ್ರ ಸ್ಥಳಾಂತರಕ್ಕೆ ಸೂಚಿಸಲಾಗಿತ್ತು. ಆದರೆ ಅಪಾಯದ ತೀವ್ರತೆ ಹೆಚ್ಚಾದ ಹಿನ್ನೆಲೆಯಲ್ಲಿ ಪಕ್ಕದ ಅನಾಹೈಮ್, ಸೈಪ್ರೆಸ್, ಸ್ಟಾಂಟನ್, ಬ್ಯೂನಾ ಪಾರ್ಕ್ ಮತ್ತು ವೆಸ್ಟ್ಮಿನ್ಸ್ಟರ್ ಸೇರಿದಂತೆ ಒಟ್ಟು 6 ನಗರಗಳ ಭಾಗಗಳಿಗೆ ಸ್ಥಳಾಂತರ ಆದೇಶವನ್ನು ವಿಸ್ತರಿಸಲಾಗಿದೆ. ಮುನ್ನೆಚ್ಚರಿಕೆ ಕ್ರಮವಾಗಿ ಈ ಭಾಗದ ಹತ್ತಾರು ಶಾಲೆಗಳನ್ನು ಮುಚ್ಚಲಾಗಿದ್ದು, ಜನರಿಗಾಗಿ ತಾತ್ಕಾಲಿಕ ಆಶ್ರಯ ಕೇಂದ್ರಗಳನ್ನು ತೆರೆಯಲಾಗಿದೆ.
