ಕೃತಕ ಬುದ್ಧಿಮತ್ತೆ (AI) ವಲಯದಲ್ಲಿ ಅತ್ಯಂತ ಹೆಚ್ಚು ಚರ್ಚೆಗೊಳಗಾಗುತ್ತಿರುವ ವಿಷಯವೊಂದರ ಮೇಲೆ ಗಮನ ಹರಿಸಲು ಓಪನ್ಏಐ (OpenAI) ಸಂಸ್ಥೆಯು ವಿಶೇಷ ಸಂಶೋಧನಾ ಹುದ್ದೆಯೊಂದನ್ನು ಪ್ರಕಟಿಸಿದ್ದು, ಅದಕ್ಕೆ ವರ್ಷಕ್ಕೆ 4,45,000 ಡಾಲರ್ (ಸುಮಾರು ₹3.7 ಕೋಟಿ) ವರೆಗೆ ಭಾರಿ ಸಂಬಳದ ಆಫರ್ ನೀಡಿದೆ. “ಒಂದು ವೇಳೆ ಮಾನವನ ಹಸ್ತಕ್ಷೇಪವಿಲ್ಲದೆಯೇ ಎಐ ವ್ಯವಸ್ಥೆಗಳು ತಾವೇ ಸ್ವತಃ ತಮಗಿಂತ ಹೆಚ್ಚು ಬುದ್ಧಿವಂತ ಆವೃತ್ತಿಗಳನ್ನು ಸೃಷ್ಟಿಸಿಕೊಳ್ಳಲು ಆರಂಭಿಸಿದರೆ ಏನಾಗಬಹುದು?” ಎಂಬ ಪ್ರಶ್ನೆಗೆ ಉತ್ತರ ಕಂಡುಕೊಳ್ಳುವುದು ಈ ಹುದ್ದೆಯ ಮುಖ್ಯ ಉದ್ದೇಶವಾಗಿದೆ.
ಮೊದಲ ಬಾರಿಗೆ ‘ಬಿಸಿನೆಸ್ ಇನ್ಸೈಡರ್’ (Business Insider) ವರದಿ ಮಾಡಿರುವ ಈ ಹುದ್ದೆಯು, ಓಪನ್ಏಐ ಸಂಸ್ಥೆಯ ಒಳಗಿರುವ ‘ಪ್ರಿಪೇರ್ಡ್ನೆಸ್’ (Preparedness – ಸುರಕ್ಷತಾ ಸನ್ನದ್ಧತೆ) ತಂಡದ ಭಾಗವಾಗಿದೆ. ಈ ತಂಡವು ಅತ್ಯಂತ ಶಕ್ತಿಶಾಲಿ ಎಐ ವ್ಯವಸ್ಥೆಗಳಿಂದ ಭವಿಷ್ಯದಲ್ಲಿ ಎದುರಾಗಬಹುದಾದ ದೀರ್ಘಾವಧಿಯ ಅಪಾಯಗಳ ಕುರಿತು ಅಧ್ಯಯನ ನಡೆಸುತ್ತದೆ. ಈ ಉದ್ಯೋಗಕ್ಕೆ ಅರ್ಜಿ ಸಲ್ಲಿಸುವ ಅಭ್ಯರ್ಥಿಗಳು ಕೇವಲ ತಾಂತ್ರಿಕವಾಗಿ ಪ್ರವೀಣರಾಗಿದ್ದರೆ ಸಾಲದು, ಬದಲಿಗೆ “ಉತ್ತಮ ಅಭಿರುಚಿ ಮತ್ತು ಕಾರ್ಯತಂತ್ರದ ಚಾತುರ್ಯ” (Tasteful and Strategic) ಉಳ್ಳವರಾಗಿರಬೇಕು ಎಂಬ ವಿಶಿಷ್ಟ ಷರತ್ತನ್ನು ವಿಧಿಸಿರುವುದು ಜಾಗತಿಕವಾಗಿ ವ್ಯಾಪಕ ಗಮನ ಸೆಳೆದಿದೆ.
”ಈ ಕೆಲಸವು ಭವಿಷ್ಯದಲ್ಲಿ ಎದುರಾಗಬಹುದಾದ, ಆದರೆ ಸದ್ಯಕ್ಕೆ ಅಸ್ತಿತ್ವದಲ್ಲಿ ಇಲ್ಲದ ಸಮಸ್ಯೆಗಳ ಕುರಿತು ತರ್ಕಬದ್ಧವಾಗಿ ಯೋಚಿಸುವುದನ್ನು ಅವಲಂಬಿಸಿದೆ. ಆದ್ದರಿಂದ ಈ ಹುದ್ದೆಗೆ ಬರುವ ವ್ಯಕ್ತಿಗಳು ಉತ್ತಮ ಅಭಿರುಚಿ ಮತ್ತು ಕಾರ್ಯತಂತ್ರದ ಚಾತುರ್ಯವನ್ನು ಹೊಂದಿರುವುದು ಅತ್ಯಂತ ಮುಖ್ಯವಾಗಿದೆ,” ಎಂದು ಉದ್ಯೋಗ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
