ಮಂಡ್ಯ: ಸ್ಕೇಚ್ ಹಾಕಿದ್ದು ಸಾಲ ಕೊಟ್ಟವನಿಗೆ, ಆದರೆ ಕುಡಿದ ಮತ್ತಿನಲ್ಲಿ ನಡೆದ ಸಣ್ಣ ಜಗಳಕ್ಕೆ ಬಲಿಯಾಗಿದ್ದು ಮಾತ್ರ ಮತ್ಯಾರೋ ನಿರಪರಾಧಿ! ಮಂಡ್ಯ ಜಿಲ್ಲೆ ಮದ್ದೂರು ತಾಲೂಕಿನ ಕೆ. ಹೊನ್ನಲಗೆರೆಯಲ್ಲಿ ಮೇ 19 ರಂದು ನಡೆದಿದ್ದ ಯುವಕನ ಬರ್ಬರ ಹತ್ಯೆ ಪ್ರಕರಣವನ್ನು ಭೇದಿಸಿರುವ ಮದ್ದೂರು ಪೊಲೀಸರು ಮೂವರು ಆರೋಪಿಗಳನ್ನು ಎಡೆಮುರಿ ಕಟ್ಟಿದ್ದಾರೆ.
ಬಂಧಿತ ಆರೋಪಿಗಳು:
ಮದ್ದೂರು ತಾಲೂಕಿನ ಅಜ್ಜಹಳ್ಳಿ ಗ್ರಾಮದ ನಿಶಾಂತ್, ಕಾರ್ತಿಕ್ ಮತ್ತು ಗೂಳೂರುದೊಡ್ಡಿಯ ರವಿ ಬಂಧಿತ ಆರೋಪಿಗಳಾಗಿದ್ದು, ಇವರನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ ಎಂದು ಮಂಡ್ಯ ಎಸ್ಪಿ ಡಾ. ವಿ. ಜೆ. ಶೋಭಾರಾಣಿ ಅವರು ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದಾರೆ.
ಅಸಲಿ ಸ್ಕೇಚ್ ಯಾರಿಗೆ? (ಘಟನೆಯ ಹಿನ್ನೆಲೆ):
ಆರೋಪಿ ನಿಶಾಂತ್ ಎಂಬಾತ ಅಶೋಕ್ ಎಂಬುವವರಿಂದ 5 ಲಕ್ಷ ರೂಪಾಯಿ ಸಾಲ ಪಡೆದಿದ್ದನು. ಸಾಲ ಕೊಟ್ಟಿದ್ದ ಅಶೋಕ್ ಹಣವನ್ನು ವಾಪಸ್ ನೀಡುವಂತೆ ಪದೇ ಪದೇ ಒತ್ತಾಯಿಸುತ್ತಿದ್ದನು. ಇದರಿಂದ ಆಕ್ರೋಶಗೊಂಡಿದ್ದ ನಿಶಾಂತ್, ಅಶೋಕ್ನನ್ನು ಹೆದರಿಸಲು ಸಂಚು ರೂಪಿಸಿ ಮಾರಕಾಸ್ತ್ರಗಳನ್ನು (ಲಾಂಗ್) ತಂದು ತನ್ನ ಕಾರಿನಲ್ಲಿ ಇಟ್ಟುಕೊಂಡಿದ್ದನು.
ಮೇ 19 ರಂದು ಅಶೋಕ್ನನ್ನು ಎದುರಿಸಲೆಂದೇ ಆರೋಪಿ ನಿಶಾಂತ್ ಹಾಗೂ ಆತನ ಸ್ನೇಹಿತರು ಕೆ. ಹೊನ್ನಲಗೆರೆಯ ದೀಪಾ ಬಾರ್ಗೆ ಬಂದು ಮದ್ಯಪಾನ ಮಾಡುತ್ತಾ ಅಶೋಕ್ಗಾಗಿ ಕಾಯುತ್ತಿದ್ದರು.
‘ಬಾಸ್’ ಕಿರಿಕ್ ತಂದಿಟ್ಟ ಆಪತ್ತು:
ಮದ್ಯ ಸೇವಿಸುವಾಗ ಆರೋಪಿ ನಿಶಾಂತ್ ಬಾರ್ ಕ್ಯಾಷಿಯರ್ನನ್ನು ಪದೇ ಪದೇ ‘ಬಾಸ್.. ಬಾಸ್..’ ಎಂದು ಕರೆಯುತ್ತಿದ್ದನು. ಈ ವೇಳೆ ಪಕ್ಕದ ಟೇಬಲ್ನಲ್ಲಿ ಮದ್ಯಪಾನ ಮಾಡುತ್ತಿದ್ದ ಸುನೀಲ್ ಹಾಗೂ ಆತನ ಸ್ನೇಹಿತರ ತಂಡಕ್ಕೆ ಇದು ಕೇಳಿಸಿದೆ. ಕುಡಿದ ಮತ್ತಿನಲ್ಲಿದ್ದ ಸುನೀಲ್, “ಯಾವ ಸೀಮೆ ಬಾಸ್ ಅವನು?” ಎಂದು ನಿಶಾಂತ್ ತಂಡವನ್ನು ಕೆಣಕಿದ್ದಾನೆ.
ಇದರಿಂದ ಮಾತಿಗೆ ಮಾತು ಬೆಳೆದು ಎರಡು ಗುಂಪುಗಳ ನಡುವೆ ಗಲಾಟೆ ಆರಂಭವಾಗಿದೆ. ತಕ್ಷಣ ಬಾರ್ನಲ್ಲಿದ್ದ ಸಹಪಾಠಿಗಳು ಹಾಗೂ ಸಿಬ್ಬಂದಿ ಜಗಳ ಬಿಡಿಸಿ ಎರಡು ಗುಂಪುಗಳನ್ನು ಅಲ್ಲಿಂದ ಕಳುಹಿಸಿಕೊಟ್ಟಿದ್ದಾರೆ.
ರಸ್ತೆ ಮಧ್ಯೆ ಬರ್ಬರ ಹತ್ಯೆ:
ಬಾರ್ನಿಂದ ಹೊರಬಂದ ಮೇಲೂ ಇವರ ಕೋಪ ತಣ್ಣಗಾಗಿರಲಿಲ್ಲ. ರಸ್ತೆ ಮಾರ್ಗ ಮಧ್ಯದಲ್ಲಿ ಮತ್ತೊಮ್ಮೆ ಎರಡೂ ಗುಂಪುಗಳು ಮುಖಾಮುಖಿಯಾಗಿದ್ದು, ಜಗಳ ವಿಕೋಪಕ್ಕೆ ತಿರುಗಿದೆ. ಈ ವೇಳೆ ನಿಶಾಂತ್ ಅಂಡ್ ಟೀಮ್ ಕಾರಿನಲ್ಲಿದ್ದ ಲಾಂಗ್ಗಳನ್ನು ತೆಗೆದುಕೊಂಡು ಸುನೀಲ್ ಮೇಲೆ ಹಿಗ್ಗಾಮುಗ್ಗಾ ದಾಳಿ ನಡೆಸಿ ಬರ್ಬರ ಮಹಾಘಾತಕವೆಸಗಿದ್ದಾರೆ. ತೀವ್ರ ರಕ್ತಸ್ರಾವದಿಂದ ಸುನೀಲ್ ಸ್ಥಳದಲ್ಲೇ ಮೃತಪಟ್ಟಿದ್ದು, ಆರೋಪಿಗಳು ಅಲ್ಲಿಂದ ಪರಾರಿಯಾಗಿದ್ದರು.
ಆರು ತಿಂಗಳ ಹಿಂದೆಯಷ್ಟೇ ಮದುವೆಯಾಗಿದ್ದ ಯುವಕ:
ಮೃತ ಸುನೀಲ್ನಿಗೆ ಕೇವಲ 6 ತಿಂಗಳ ಹಿಂದೆಯಷ್ಟೇ ಮದುವೆಯಾಗಿತ್ತು. ಕುಡಿದ ಮತ್ತಿನಲ್ಲಿ ನಡೆದ ಕ್ಷುಲ್ಲಕ ಜಗಳಕ್ಕೆ ಯುವಕನ ಪ್ರಾಣ ಹೋಗಿರುವುದು ಇಡೀ ಕುಟುಂಬವನ್ನು ಕಣ್ಣೀರಲ್ಲಿ ಮುಳುಗಿಸಿದೆ.
ತನಿಖೆ ಚುರುಕುಗೊಳಿಸಿದ್ದ ಪೊಲೀಸರು:
ಕೊಲೆ ನಡೆದ ಬಳಿಕ ಮದ್ದೂರು ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿತ್ತು. ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ ಮಂಡ್ಯ ಎಸ್ಪಿ ಡಾ. ವಿ. ಜೆ. ಶೋಭಾರಾಣಿ ಅವರು ಆರೋಪಿಗಳ ಪತ್ತೆಗೆ ವಿಶೇಷ ಪೊಲೀಸ್ ತಂಡವನ್ನು ರಚಿಸಿದ್ದರು. ಕಾರ್ಯಾಚರಣೆ ನಡೆಸಿದ ಮದ್ದೂರು ಪೊಲೀಸರು ತಲೆಮರೆಸಿಕೊಂಡಿದ್ದ ಮೂವರು ಪ್ರಮುಖ ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
