ನವದೆಹಲಿ: ಎಂಪ್ಲಾಯೀಸ್ ಪ್ರಾವಿಡೆಂಟ್ ಫಂಡ್ ಆರ್ಗನೈಸೇಶನ್ (EPFO) ತನ್ನ ಕೋಟ್ಯಂತರ ಚಂದಾದಾರರಿಗಾಗಿ ಶೀಘ್ರದಲ್ಲೇ ಹೊಸ ಡಿಜಿಟಲ್ ಸೇವೆಯೊಂದನ್ನು ಆರಂಭಿಸಲು ಸಜ್ಜಾಗಿದೆ. ಈ ಹೊಸ ಸೌಲಭ್ಯದ ನೆರವಿನಿಂದಾಗಿ, ಗ್ರಾಹಕರು ತಮ್ಮ ಪಿಎಫ್ (PF) ಖಾತೆಯ ವಿವರಗಳನ್ನು ಪರಿಶೀಲಿಸಲು ಇಪಿಎಫ್ಒ ವೆಬ್ಸೈಟ್ಗೆ ಲಾಗಿನ್ ಆಗುವ ಅಥವಾ ಕಚೇರಿಗಳಿಗೆ ಅಲೆಯುವ ಅಗತ್ಯವಿರುವುದಿಲ್ಲ. ವಾಟ್ಸಾಪ್ನಲ್ಲಿ ಕೇವಲ ‘ಹಲೋ’ (Hello) ಎಂದು ಸಂದೇಶ ಕಳುಹಿಸುವ ಮೂಲಕ ಪಿಎಫ್ಗೆ ಸಂಬಂಧಿಸಿದ ಎಲ್ಲಾ ಪ್ರಮುಖ ಮಾಹಿತಿಗಳನ್ನು ಸುಲಭವಾಗಿ ಪಡೆಯಬಹುದು. ಇದು ಪಿಎಫ್ ಖಾತೆಯ ನಿರ್ವಹಣೆಯನ್ನು ಹಿಂದೆಂದಿಗಿಂತಲೂ ಹೆಚ್ಚು ಸರಳಗೊಳಿಸಲಿದೆ.
ವಾಟ್ಸಾಪ್ನಲ್ಲಿ ಪಿಎಫ್ ಸೇವೆ ಪಡೆಯುವುದು ಹೇಗೆ?
ಇಪಿಎಫ್ಒ ಶೀಘ್ರದಲ್ಲೇ ದೇಶಾದ್ಯಂತ ಏಕರೂಪದ ಅಧಿಕೃತ ವಾಟ್ಸಾಪ್ ಸಂಖ್ಯೆಯನ್ನು ಬಿಡುಗಡೆ ಮಾಡಲಿದೆ.
ಈ ನಂಬರ್ಗೆ ಗ್ರಾಹಕರು ‘Hello’ ಎಂದು ಮೆಸೇಜ್ ಮಾಡಿದರೆ, ವಿವಿಧ ಸೇವೆಗಳ ಆಯ್ಕೆಗಳು ಸ್ಕ್ರೀನ್ ಮೇಲೆ ಕಾಣಿಸಿಕೊಳ್ಳುತ್ತವೆ.
ಇದರ ಮೂಲಕ ಗ್ರಾಹಕರು ತಮ್ಮ ಪಿಎಫ್ ಬ್ಯಾಲೆನ್ಸ್ (PF Balance), ಕೊನೆಯ 5 ವಹಿವಾಟುಗಳ ವಿವರ (Last 5 transactions), ಕ್ಲೈಮ್ ಸ್ಟೇಟಸ್ (Claim Status) ಮತ್ತು ದೂರುಗಳ ಸ್ಥಿತಿಗತಿಯನ್ನು ತಕ್ಷಣವೇ ತಿಳಿದುಕೊಳ್ಳಬಹುದು.
ಪ್ರಾದೇಶಿಕ ಭಾಷೆ ಮತ್ತು AI ಚಾಟ್ಬಾಟ್ ಸೌಲಭ್ಯ:
ಖಾಸಗಿ ಭಾಷೆಯಲ್ಲೇ ಮಾಹಿತಿ: ಈ ಹೊಸ ಸೇವೆಯ ಪ್ರಮುಖ ವೈಶಿಷ್ಟ್ಯವೆಂದರೆ ಗ್ರಾಹಕರು ತಮ್ಮದೇ ಆದ ಸ್ವಂತ ಭಾಷೆಯಲ್ಲಿ ಮಾಹಿತಿಯನ್ನು ಪಡೆಯಬಹುದು. ಇದು ಕನ್ನಡ ಸೇರಿದಂತೆ ಹಲವು ಭಾರತೀಯ ಭಾಷೆಗಳಲ್ಲಿ ಲಭ್ಯವಿರಲಿದೆ ಎನ್ನಲಾಗಿದೆ.
24/7 ಲಭ್ಯತೆ: ಈ ಸೇವೆಯು ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಆಧಾರಿತ ಚಾಟ್ಬಾಟ್ ಮೂಲಕ ಕಾರ್ಯನಿರ್ವಹಿಸಲಿದ್ದು, ವಾರದ 7 ದಿನಗಳೂ, 24 ಗಂಟೆಗಳ ಕಾಲ ಲಭ್ಯವಿರಲಿದೆ.
ತ್ವರಿತ ಪರಿಹಾರ: ಈ ಎಐ ಚಾಟ್ಬಾಟ್ ಕೇವಲ ಸಾಮಾನ್ಯ ಪ್ರಶ್ನೆಗಳಿಗೆ ಮಾತ್ರವಲ್ಲದೆ, ಪಿಎಫ್ಗೆ ಸಂಬಂಧಿಸಿದ ಸಂಕೀರ್ಣ ಪ್ರಶ್ನೆಗಳಿಗೂ ತಕ್ಷಣವೇ ಉತ್ತರಿಸುತ್ತದೆ. ಅಷ್ಟೇ ಅಲ್ಲದೆ, ನಿಮ್ಮ ಸಮಸ್ಯೆಗೆ ಮುಂದಿನ ಪರಿಹಾರವೇನು ಎಂಬುದನ್ನೂ ಸಹ ಇದು ಮಾರ್ಗದರ್ಶನ ಮಾಡುತ್ತದೆ.
ಕಚೇರಿಗಳಿಗೆ ಅಲೆಯುವ ಕಷ್ಟ ತಪ್ಪಲಿದೆ!
ಈ ಹೊಸ ತಂತ್ರಜ್ಞಾನದ ಬಳಕೆಯಿಂದಾಗಿ ಸಾರ್ವಜನಿಕರು ಸಣ್ಣಪುಟ್ಟ ಕೆಲಸಗಳಿಗೂ ಇಪಿಎಫ್ಒ ಕಚೇರಿಗಳಿಗೆ ಪದೇ ಪದೇ ಅಲೆಯುವುದು ತಪ್ಪಲಿದೆ. ಗ್ರಾಹಕರ ದೂರುಗಳನ್ನು ತಕ್ಷಣವೇ ಇತ್ಯರ್ಥಪಡಿಸಲಾಗುವುದು ಎಂದು ಸರ್ಕಾರ ತಿಳಿಸಿದೆ. ಇಪಿಎಫ್ಒದಲ್ಲಿ ಬಾಕಿ ಉಳಿದಿರುವ ಕ್ಲೈಮ್ಗಳ ಸಂಖ್ಯೆಯನ್ನು ಕಡಿಮೆ ಮಾಡಲು ವಿಶೇಷ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ ಎಂದು ಕೇಂದ್ರ ಕಾರ್ಮಿಕ ಸಚಿವ ಮನ್ಸುಖ್ ಮಾಂಡವಿಯಾ ತಿಳಿಸಿದ್ದಾರೆ.
