ಬೆಂಗಳೂರು: ವಿಮಾನ ನಿಲ್ದಾಣ, ರೈಲ್ವೆ ನಿಲ್ದಾಣ ಹಾಗೂ ಬಸ್ ನಿಲ್ದಾಣಗಳಂತಹ ಸಾರ್ವಜನಿಕ ಸ್ಥಳಗಳಲ್ಲಿ ಮೊಬೈಲ್ ಚಾರ್ಜ್ ಮಾಡುವ ಮುನ್ನ ಜಾಗರೂಕರಾಗಿರಿ! ಸಾರ್ವಜನಿಕ ಯುಎಸ್ಬಿ (USB) ಚಾರ್ಜಿಂಗ್ ಸಾಕೆಟ್ಗಳ ಮೂಲಕ ಸಾರ್ವಜನಿಕರ ವೈಯಕ್ತಿಕ ವಿವರಗಳನ್ನು ಕದಿಯುವ ಜಾಲ ಸಕ್ರಿಯವಾಗಿದ್ದು, ಈ ಕುರಿತು ರಾಜ್ಯ ಸೈಬರ್ ಪೊಲೀಸ್ ಇಲಾಖೆ ತೀವ್ರ ಎಚ್ಚರಿಕೆ ನೀಡಿದೆ.
ಸಾರ್ವಜನಿಕ ಸ್ಥಳಗಳಲ್ಲಿ ಅಳವಡಿಸಲಾಗಿರುವ ಯುಎಸ್ಬಿ ಪೋರ್ಟ್ಗಳಲ್ಲಿ ಹ್ಯಾಕರ್ಗಳು ಚಿಪ್ ಅಥವಾ ಸಾಫ್ಟ್ವೇರ್ ಅಳವಡಿಸಿರುತ್ತಾರೆ. ಇಲ್ಲಿಗೆ ಮೊಬೈಲ್ ಅಥವಾ ಲ್ಯಾಪ್ಟಾಪ್ ಕನೆಕ್ಟ್ ಮಾಡಿದ ತಕ್ಷಣ, ಅದರಲ್ಲಿರುವ ಫೋಟೋ, ವಿಡಿಯೋ, ಬ್ಯಾಂಕ್ ಖಾತೆ ವಿವರಗಳು ಹಾಗೂ ಇತರೆ ವೈಯಕ್ತಿಕ ಮಾಹಿತಿಗಳನ್ನು ಸೈಬರ್ ಕಳ್ಳರು ಸುಲಭವಾಗಿ ಲೂಟಿ ಮಾಡುತ್ತಿದ್ದಾರೆ. ಪೊಲೀಸ್ ಇಲಾಖೆ ಈ ವಂಚನೆಗೆ ‘ಮಾಲ್ವೇರ್ ಅಪಾಯ’ ಹಾಗೂ ‘ಜ್ಯೂಸ್ ಜಾಕಿಂಗ್’ (Juice Jacking) ಎಂದು ಕರೆದಿದೆ.
ಕಳ್ಳತನ ಮಾಡಿದ ಡೇಟಾ ಏನಾಗುತ್ತದೆ?
ಹಣದ ಲೂಟಿ: ಫೋನ್ನಲ್ಲಿರುವ ಬ್ಯಾಂಕಿಂಗ್ ಆ್ಯಪ್ಗಳು, ಯುಪಿಐ (UPI), ಡೆಬಿಟ್/ಕ್ರೆಡಿಟ್ ಕಾರ್ಡ್ ಹಾಗೂ ಆಧಾರ್-ಪ್ಯಾನ್ ವಿವರಗಳನ್ನು ಬಳಸಿ ಆನ್ಲೈನ್ ಶಾಪಿಂಗ್ ಅಥವಾ ಹಣ ವರ್ಗಾವಣೆ ಮಾಡಿಕೊಳ್ಳುತ್ತಾರೆ.
ಬ್ಲಾಕ್ ಮೇಲ್: ವೈಯಕ್ತಿಕ ಫೋಟೋ ಮತ್ತು ವಿಡಿಯೋಗಳನ್ನು ಕದ್ದು, ಅವುಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಮಾಡುವುದಾಗಿ ಬೆದರಿಸಿ ಹಣಕ್ಕೆ ಬೇಡಿಕೆ ಇಡುತ್ತಾರೆ.
ಡಾರ್ಕ್ ವೆಬ್ನಲ್ಲಿ ಮಾರಾಟ: ಕದ್ದ ವೈಯಕ್ತಿಕ ಮಾಹಿತಿಯನ್ನು ಇತರೆ ಅಪರಾಧ ಕೃತ್ಯಗಳಿಗಾಗಿ ಡಾರ್ಕ್ ವೆಬ್ನಲ್ಲಿ ಮಾರಾಟ ಮಾಡಲಾಗುತ್ತದೆ ಎಂದು ಸೈಬರ್ ಭದ್ರತಾ ತಜ್ಞರು ತಿಳಿಸಿದ್ದಾರೆ.
ಸೈಬರ್ ಪೊಲೀಸರ ಪ್ರಮುಖ ಸಲಹೆಗಳು:
ಸ್ವಂತ ಚಾರ್ಜರ್ ಬಳಸಿ: ಸಾರ್ವಜನಿಕ ಯುಎಸ್ಬಿ ಪೋರ್ಟ್ಗಳ ಬದಲಿಗೆ, ನಿಮ್ಮದೇ ಆದ ಸ್ವಂತ ಚಾರ್ಜರ್ (ಅಡಾಪ್ಟರ್) ಅನ್ನು ನೇರವಾಗಿ ಎಲೆಕ್ಟ್ರಿಕಲ್ ಪ್ಲಗ್ ಸಾಕೆಟ್ಗೆ ಹಾಕಿ ಚಾರ್ಜ್ ಮಾಡುವುದು ಅತ್ಯಂತ ಸುರಕ್ಷಿತ.
ಪವರ್ ಬ್ಯಾಂಕ್ ಉಪಯೋಗಿಸಿ: ಪ್ರಯಾಣದ ಸಮಯದಲ್ಲಿ ಮೊಬೈಲ್ ಬ್ಯಾಟರಿ ಖಾಲಿಯಾಗುವ ಭೀತಿ ಎದುರಿಸುವವರು ಕಡ್ಡಾಯವಾಗಿ ಪವರ್ ಬ್ಯಾಂಕ್ ಅನ್ನು ಜೊತೆಯಲ್ಲಿಟ್ಟುಕೊಳ್ಳುವುದು ಒಳಿತು.
ಡೇಟಾ ಬ್ಲಾಕರ್ ಬಳಸಿ: ಅನಿವಾರ್ಯ ಸಂದರ್ಭಗಳಲ್ಲಿ ಸಾರ್ವಜನಿಕ ಯುಎಸ್ಬಿ ಪೋರ್ಟ್ಗಳನ್ನೇ ಬಳಸಬೇಕಾಗಿ ಬಂದರೆ, ‘ಯುಎಸ್ಬಿ ಡೇಟಾ ಬ್ಲಾಕರ್’ (USB Data Blocker) ಸಾಧನವನ್ನು ಬಳಸಿ.
ಸಾರ್ವಜನಿಕ ಯುಎಸ್ಬಿ ಪೋರ್ಟ್ಗೆ ಮೊಬೈಲ್ ಕನೆಕ್ಟ್ ಮಾಡಿದಾಗ ಒಂದು ವೇಳೆ ಫೋನ್ ಪರದೆಯ ಮೇಲೆ ‘ಟ್ರಸ್ಟ್ ದಿಸ್ ಡಿವೈಸ್’ (Trust this device) ಅಥವಾ ‘ಅಲೋವ್ ಡೇಟಾ ಆಕ್ಸೆಸ್’ (Allow data access) ಎಂಬ ಅನುಮತಿ ಕೇಳಿದರೆ, ತಕ್ಷಣ ಅದನ್ನು ನಿರಾಕರಿಸಿ (Deny ಅಥವಾ Charging Only ಆಯ್ಕೆಯನ್ನು ಆರಿಸಿ) ಎಂದು ಹಿರಿಯ ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.
